DOKEZO Wito kwa Wizara ya Afya kuchunguza ongezeko la Maabara za Vipimo za Binadamu nchini hususani Vijijini na miji midogo

DOKEZO Wito kwa Wizara ya Afya kuchunguza ongezeko la Maabara za Vipimo za Binadamu nchini hususani Vijijini na miji midogo

Hili ni dokezo maalum toka kwa mwananchi mtumiaji wa JF mwenye nia ya kuusaidia umma kuwa na taarifa 'maalum'
A

Anonymous

Guest
Ninaomba kutumia jukwaa hili kutoa wito kwa Wizara ya Afya na mamlaka husika kuchunguza ongezeko la maabara za vipimo vya binadamu nchini, hususan vijijini na katika miji midogo, na kuhakikisha zinazingatia viwango vya ubora na usalama wa huduma.

Pamoja na kuwepo kwa mifumo ya usajili na udhibiti wa maabara, ikiwemo HFR, kuna haja ya kujiuliza kama ufuatiliaji wa ubora unaendelea kwa ufanisi baada ya maabara kupewa vibali na kuanza kutoa huduma.

Je, vifaa vinakaguliwa mara kwa mara? Vitendanishi vinatumika kwa usahihi na ndani ya muda wake? Vipimo vinafanywa na wataalamu wenye sifa zinazotakiwa? Na je, kuna uhakika wa usahihi na uaminifu wa majibu yanayotolewa kwa wananchi?

Jambo hili ni muhimu kwa sababu majibu ya maabara yana mchango mkubwa katika maamuzi ya kitabibu. Vipimo visivyo sahihi vinaweza kusababisha mgonjwa kupata matibabu yasiyofaa au kuchelewa kupata huduma anazohitaji.

WITO KWA WIZARA YA AFYA NA MAMLAKA HUSIKA:
  1. Kufanya ukaguzi wa mara kwa mara wa maabara, hasa zile zilizopo vijijini na miji midogo.
  2. Kuhakikisha maabara zote zina usajili na vibali halali vya kufanya kazi.
  3. Kuhakikisha vipimo vinafanywa na wataalamu wenye sifa na usajili unaotakiwa.
  4. Kufanya tathmini ya kitaalamu kuhusu ubora na usahihi wa vipimo vinavyotolewa.
  5. Kuchukua hatua kwa maabara zinazokiuka viwango vilivyowekwa.
  6. Kutoa elimu kwa wananchi kuhusu namna ya kutambua maabara zilizoidhinishwa na kuhakiki uhalali wa huduma wanazopewa.
Huu si wito wa kushutumu taasisi au mtu yeyote, bali ni suala la kulinda afya za wananchi. Ni muhimu kuhakikisha kuwa ongezeko la maabara linaenda sambamba na uwezo wa mamlaka kuzisimamia na kudhibiti ubora wa huduma.

Naiomba Wizara ya Afya, Bodi ya Maabara Binafsi za Afya (PHLB) na mamlaka nyingine zinazohusika kulifanyia kazi suala hili kwa uzito unaostahili.

Afya ya mwananchi haiwezi kutegemea tu uwepo wa maabara, bali pia uhakika kwamba vipimo vinavyofanyika na majibu yanayotolewa ni sahihi na ya kuaminika.
 
Sambamba na hili la ukaguzi wa ubora wa maabara zinazoendelea kuota kama uyoga kila kona ya mtaa,..

Wizara pia ingetupia jicho kwenye maduka ya dawa muhimu za binadamu...
Kwa kweli Watu wanauziwa dawa zilizoisha muda wake na wakati mwingine unalazimishwa kuuziwa dawa nyingine ukiambiwa inatibu ugonjwa wako ...

Wenye maabara wana maduka yao pembeni, ..
Ukipima lazima ukutwe na magonjwa zaidi ya mawili matatu ili ukanunue dawa...
 
Back
Top Bottom