Anga la washenzi na Joana anaona kitu usiku

Anga la washenzi na Joana anaona kitu usiku

*ANGA LA WASHENZI – 25*

*Simulizi za series*

Nade alishtuka, ila kumeza mshtuko huo akatabasamu kana kwamba hakuna kilichotokea. Akamtazama Jona na macho ya wenza, akiuliza:

“Kuna tatizo?”

Jona akatikisa kichwa kukataa. Lakini akamtaka Nade wakapate maongezi kidogo ndani kama hatojali. Nada akatazama kwanza saa yake kabla hajabinua mdomo na kupandisha mabega.

“Ts ok!”

Wakati wanageuka, mara Nade akaona gari fulani kwa mbele yao. Haikuwa umbeli mrefu sana na gari hili lilikuwa limewapa ubapa.

Lilikuwa ni Altezza moja nyeusi, vioo vyake vyote vilikuwa vimezibwa isipokuwa cha dereva pekee.

Kufumba na kufumbua, dereva huyo akatoa mkono wenye bunduki ambayo mdomowe aliuelekezea kule alipo Nade na Jona. Nade akatoa macho kwa mshangao. Katika kasi ya ajabu, akamsukuma Jona waangukie chini.

Sauti ya risasi ikavuma, paah!

Risasi ikatoboa bega la Nade, na mara gari ikachomoka mbio kupotea. Jona akamkarimu Nade kwa kubana mkono wake kwenye jeraha. Huku akimwambia kwamba wana haja ya kumuona daktari haraka iwezekanavyo.

“Sitaki kwenda hospitali,” Nade akasema.

Basi Jona akambeba begani na kwenda naye mpaka nyumbani. Akamlaza chini na kisha akaleta pamba na kopo kubwa la spirit. Kisha akaleta na vifaa fulani ambavyo Nade alistaajabu Jona amevitolea wapi.

Akagundua kwamba ndani ya nyumba ya Nade kulikuwa kuna vitu karibia vyote. Wakati Nade anahangaika kumtibia, yeye alikuwa anapekua pekua, japokuwa hakuona kila jambo, alifanikiwa kuona angalau vichache.

Jona akatoa chuma cha risasi begani mwa Nade, na kisha akampakaa spirit.

“Upo tayari nikushone.”

“Ndio,” Nade akajibu.

Jibu hilo likamshangaza sana Jona maana hakulitegemea kama lingetoka hivyo haraka tena pasipo kusita. Hapo akajua namna gani mwanamke huyo alivyo jasiri. Alivyo mgumu na roho ya kijeshi.

Kuthibitisha hilo zaidi, Jona akachukua uzi na kumshona Nade. Nyuzi si chini ya tano zikaenda begani. Nade akiwa ameng’ata kipande cha mti ambacho Jona alikuwa amemkabidhi apate kupotezea maumivu.

“Ulijifunzia wapi haya?” Nade akauliza.

“Sehemu mbalimbali tu. Nilikuwa napenda sana kuwa daktari ningali mtoto.”

Wakamaliza zoezi lao na kuketi. Jona akamhudumia Nade pombe kali kwenye glasi kisha maongezi mafupi yakachukua nafasi.

“Umekuwa ukinifuatilia toka muda gani?” Jona akauliza. Nade akajitahidi kukanusha ila mwishowe akakubali kwamba alikuwa anamfuatilia Jona kisiri kwa mujibu wa amri ya mheshimiwa Eliakimu.

“Unajua anakuwa na presha kama kazi yake itafanyika au lah.”

Sababu hiyo ikagoma kuiingia ndani ya kichwa cha Jona. Akauliza:

“Nade, Eliakimu anamhitaji mkewe kwasababu gani haswa? Kuna nini ambacho hataki nigundue?”

Nade akakanusha yote hayo akimsisitizia Jona kwamba wao shida yao ni Miriam tu. na hapohapo akaulizia harakati za Jona kumtafuta mwanamke huyo zimeishia wapi.

“Bado naendelea, msijali nitawataarifu.”

Maongezi hayo hayakudumu muda mrefu kwasababu kila upande ulikuwa mwangalifu kupitiliza kutamka lolote. Mwishowe wakajikuta wanajadili mengine ambayo yalionekana kusisimua kila upande.

“Ilikuaje ukakutana na Eliakimu?”

Nade akashusha kwanza pumzi. Akasema hapendi kuongelea sana mambo yake ya kale. Ila basi kwakuwa ametaka kujua, hana budi kumjuza.

Watu wengi wamekuwa wakiamini kwamba Nade ni ndugu yake Eliakimu kwa uaminifu wake na uchapakazi wake. Lakini pia kujitolea kwake kumfanyia kazi mheshimiwa huyo, ila kiuhalisia ni kinyume.

“Mimi nilikuwa mfanyakazi wa ndani wa bwana Eliakimu. Tokea kipindi hicho akiwa anagombea ubunge tu na hana hili wala lile kuhusu uwaziri. Alinitoa kwetu Tanga, kwa wazazi wangu maskini.

Akanilelea kama mtoto wake, nikishiriki naye meza moja … si kama mfanyakazi, bali kama mwanafamilia mwenzao.”

“Ikawaje mpaka kukupa nafasi hii?” Jona akakatiza kuuliza. Nade akatabasamu. Alijua fika huko ndipo ambapo Jona alikuwa anapataka.

“Ni siku moja tu ndiyo ambayo mambo yalibadilika. Siku hiyo nakumbuka ilikuwa ni jumapili jioni, mheshimiwa akiwa ameshatoka huko bungeni, alifanikiwa kuupata ubunge.

Siku hiyo alipoingia ndani, kumbe kulikuwa kuna mtu alikuwa amepanga kumuua, na mtu huyo hakuwa mwingine isipokuwa bodyguard wake. Kwa kutumia bunduki. Na alitaka kummaliza ndani ya nyumba yake.

Kama Mungu, wakati nipo jikoni, kwa kupitia kioo cha dirisha la sehemu ya kulia chakula, nikaona bodyguard akichomoa bunduki kiunoni. Basi haraka nikanyaka birika la chai, nikatoka na kulirusha, likamkita bodyguard na kumlaza chali.

Mheshimiwa akfurahi sana kwa kumwokoa maisha. Tangu hapo hakuamini bodyguard, na akataka mimi ndiye niwe bodyguard wake, kwahiyo akamwita mtu na kuanza kunifunda martial arts.”

Jona akamuuliza kama walijua kwanini Mheshimiwa alilengwa kuuawa, Nade akamwambia ulikuwa ni upinzani wa kisiasa tu. Hamna cha ziada.

Ila Nade kabla hajaondoka, akataka kujua kwanini mtu yule ndani ya gari alikuwa anataka kummaliza Jona. Kufupisha habari, Jona akamwambia hafahamu. Ila kichwani kwake tayari alishajua, si wengine bali wale wachina wanaodai picha.

Na aliapa kuwashikisha adabu.


***


“Nakuja, nakuja!” sauti ya Mudy ilisikika kwa ndanii. Nje ya nyumba yake, mlangoni alikuwa amesimama mwanaume mmoja aliyevalia suti na kubebelea mkoba wa rangi ya kahawia.

Kutazama usoni, hakuwa mwingine bali Brokoli. Nywele zake alikuwa amezifumisha vema kuficha uzee. Macho yake alikuwa ameyavesha miwani mepesi ya jua.

Punde mlango unafunguliwa, na Mudy anatokea akiwa ameshikilia kipande cha mkate mkononi. Amevalia bukta nyeusi ya mpira. Akatoa macho kumwona Brokoli mbele yake.

Yalikuwa ni majira ya saa kumi hivi, ila iliyoelemewa na dakika kuifuata saa kumi na moja.

“Mkuu!” Mudy akastaajabu na mkate wake mdomoni. “Karibu, karibu.”

Brokoli akatabasamu akiingia. Akaketi kabla Mudy hajamuuliza angependelea kitu gani. Brokoli akasema maji tu yanamtosha. Na pasipo kupoteza muda, akasema nini kimemleta pale.

“Kuna nyaraka fulani sizioni kule ofisini. Zipo wapi?”

Kauli hiyo ikashtua moyo wa Mudy. Alijikuta anasisimkwa vinyweleo na kupigwa bumbuwazi.

“Hakuna nyaraka ambazo nimechukua mkuu!”

“Sijasema kwamba umechukua, nimeuliza zipo wapi.”

“Sijajua. Ni nyaraka gani hizo unazoziongelea?”

Naye Brokoli hakusema ni nyaraka hizo anazoziongelea. Basi akafungua mkoba wake na kutoa bunduki yenye kiwamba cha kumezea sauti. Akaikoki bunduki hiyo na kumwonyeshea Mudy pasipo kusema kitu.

Mudy akaanza kuropoka. Ya kwamba nyaraka hizo amempatia Kinoo kwani alikuwa anazihitaji, na pia amepanga kuchuku hatua kuhusu kifo cha Bite.

Brokoli akatikisa kichwa na kusema:

“Ahsante. Hicho ndicho nilikuwa nataka.” Kisha akaminya kitufe cha bunduki, bunduki ikakohoa na kumwangusha Mudy chini. Paji lake la uso lilikuwa limetobolewa likivujisha damu.

Brokoli akasafisha bunduki yake vema na kitambaa alichokitoa ndani ya mkoba alafu akarejesha bunduki yake mkobani baada ya kuhakikisha amebebea simu ya Mudy.

Akatoka ndani ya uzio, na kujiweka kwenye gari lake VX ya grey, akatimka akiweka simu sikioni.

Punde simu ikapokelewa, akasema:

“Ameuza taarifa … kwa jamaa yule jamaa, Kinoo.” Akakata simu na kuendelea na safari.


***


Rrrrrrrrrrrrnng! Rrrrrrrrrnnngg! Lee akashtuka na kutazama simu yake. Alikuwa maeneo ya nyumbani kwake na majira yalikuwa ni ya saa nne usiku,

Jina kwenye kioo halikutokea, bali namna mpya. Aksita kidogo kupokea, ila akapuuza na kuweka simu sikioni. Akanyamaza amsikie kwanza sauti ya aliyempigia. Alikuwa ni mwanaume mwenye sauti nzito.

“Yes, Lee anaongea.”

“Wewe ndiye yule mchina, si ndio?”

Lee hapendi kuitwa hivyo. Ila hakujali, alihisi kuna habari njema inafuata. Akawahi kujibu na kutega sikio.

“Mimi ni baunsa wa hapa klabu ulipoacha namba yako. Nimemwona yule msichana uliyekuwa unamtafuta.”

“Una uhakika?”

“Ndio. Kwa mujibu wa maelezo yako.”

Lee akanyanyuka upesi. Hakumuaga yeyote yule, akajipaki kwenye gari na kwenda moja kwa moja klabu. Alipofika akapiga namba ile iliyompigia, akaongea na kuelekezwa aende wapi.

Akakutana na baunsa aliyevalia ‘kibodi’ cheupe aliyemdai pesa yake kwanza kabla hajamuonyesha mlengwa.

“Tulipane kwanza, vipi ukin’toroka.”

Lee asifanye ajizi, akazama mfukoni na kumpatia baunsa ‘wekundu’ watatu. Baunsa akatabasamu, akamnyakua Lee mpaka ndani. Akamnyooshea kidole mwanamke fulani kwenye kona ya klabu.

Alikuwa amekaa na wenzake akifunikwa na nywele ndefu za badia. Alikuwa amevalia gauni fupi, pamoja na wenzake pia. Taa za rangii rangi zilikuwa zinamulika mulika watu wakipata ‘kilaji’ kungoja usiku uwe mzito zaidi.

Mdundo mzito wa muziki ulikuwa unakita.

Lee akamsogelea mwanamke yule na kumshika bega kwanguvu. Mwanamke huyo alipomtazama, akagundua siye yule aliyekuwa anamtaka. Akaomba radhi na kurejea kwa bodyguard haraka.

“Sio yule!” akang’aka. Bodyguard akashadadia kwamba maelezo yake yaliendana na mwanamke huyo. Lee akataka pesa yake, bodyguard hakuwa tayari kumpatia.

Ugomvi ukazuka.

Wakavutana nje wapate kuonyeshana. Nyama za bodyguard zikamfanya aamini kwamba anaweza kumdhibiti Lee mwenye mwili wa sisimizi.

Bahati kabla hawajaanza pambano, Lee akamshuhudia mwanamke yule aliyekuwa anamtaka. Alikuwa yupo na mwanaume fulani hivi wakifuata mlango wa kuzamia klabu. Lee akaachana na baunsa yule, akakimbilia kwa yule mwanamke.

Akamdaka mkono na kumvuta.

“Unanikumbuka?”


NINI KITAJIRI?
 
*ANGA LA WASHENZI --- 26*

*Simulizi za series*


ILIPOISHIA

Ugomvi ukazuka.

Wakavutana nje wapate kuonyeshana. Nyama za bodyguard zikamfanya aamini kwamba anaweza kumdhibiti Lee mwenye mwili wa sisimizi.

Bahati kabla hawajaanza pambano, Lee akamshuhudia mwanamke yule aliyekuwa anamtaka. Alikuwa yupo na mwanaume fulani hivi wakifuata mlango wa kuzamia klabu. Lee akaachana na baunsa yule, akakimbilia kwa yule mwanamke.

Akamdaka mkono na kumvuta.

“Unanikumbuka?”

ENDELEA

Mwanamke akaigiza hamjui Lee. Alimtaka mwanaume huyo amwachie mkono wake kabla hajamuitia mwizi. Lee akajikuta anatabasamu. Wakati huo na yule mwanaume aliyeongozana na mwanamke huyo anataka kuchukua hatua dhidi ya Lee.

“Sitaki ukorofi wowote. Ninachotaka ni pochi yangu na vile vilivyomo ndani tu. Sina shida na pesa bali nyaraka.”

Bado mwanamke akang’ang’ania msimamo kwamba hana chochote cha Lee. Yule ‘bwana’ aliyekuwa ameambatana na mwanamke huyo akamtaka Lee aondoke na awaache waendelee na mambo yao.

“Tumekuja hapa kustarehe, si kupigana.”

Lee akashindwa kuzuia hasira zake, akamvuta kwanguvu yule mwanamke upande wake kisha akamchakaza mwanaume yule mwambatanizi kwa muda usiozidi dakika moja! Mikono na miguu yake ilikuwa mepesi kana kwamba inaendeshwa na mota.

Haraka naye baunsa akasonga kukata ngebe. Alichokumbana nacho lazima akahadithie nyumbani kwa mkewe.

Alijikuta anashikilia shingo yake kwa maumivu makali, mbavu zikiwa zimetepeta na yupo chini! Kama ungemuuliza ni kwa muda gani amepigwa hivyo, asingekuwa na jibu moja.

Lee akahepa zake kufuata gari watu wakimtazama kwa mshangao. Hakuna aliyethubutu kuhangaika naye.

Akapeleka gari mpaka nyumbani kwa huyo mwanamke akiamuru apewe pochi haraka iwezekanavyo. Hakuwa na hata tone la utani!

Mwanamke akiwa analia kwa hofu, akatafuta pochi ndani lakini hakuikuta. Akahisi anauawa. Mbona pochi ilikuwepo jana? Alijiuliza akihangaika na mikono yake inayotetemeka.

Hakuona kitu.

Macho yake yakiwa mekundu, akamwambia Lee ya kwamba hajapata kitu.

“Sitaki ujinga na tusipotezeane muda. Naomba pochi!”

Katika kuchambua fikira zake, mwanamke akakumbuka jana alimleta mgeni chumbani hapo. Pengine yeye ndiye atakuwa kaichukua.

“Twende kwake,” Lee akasema haraka. Na pasipo kupoteza muda wakaenda mpaka kwa mwanaume huyo. Uzuri mwanamke alikuwa anapafahamu. Ni mwanaume mteja wake wa enzi, mara zingine huwa anaenda kwake huduma ikiwa inahitajika.

“Naomba niende kuongea naye,” mwanamke akasema walipofika kwenye chumba cha mlengwa wao. Lee akakataa na kutaka waende pamoja kwa kuogopa kutiwa mchanga wa macho.

Akiwa yupo nyuma, akaongozana na mwanamke huyo mpaka mlangoni, akagonga na uzuri kuna mtu akawapokea, japokuwa hakuwa mlengwa wao. Alikuwa ni mwanamke mnene mweupe aliyevalia khanga.

Alitoka usingizini na ugeni ule ulimshtua. Lee akaeleza haja yake, lakini mwanamke yule akamwambia hawezi kumsaidia kwani mwenyewe hayupo.

Lee hakutaka kungoja, akazama ndani kwa mabavu. Akasaka chumba na kukuta pochi yake mezani. Akaipekua, akakuta hamna kitu! Basi asipoteze muda hapo, akachukua picha moja ya mwanaume aliyoikuta mezani, pasipoti, kisha akamrudia yule mwanamke mnene na kumuuliza:

“Atakuwa ameenda wapi?”

“Sijui!”

“Mimi najua atakapokuwa mida hii,” akadakia mwanamke aliyekuja na Lee. Basi pasipo kukawiza, wakaenda kwenye gari na safari ikaanza.

“Anapenda kwenda sana viwanja. Kama hayupo Ambiance, basi atakuwa Billicanas.”

Wakaanzia Ambiance, wakahaha klabu nzima. Hapo ndiyo yule mwanamke akajua namna gani Lee alikuwa anamaanisha kutafuta kile kilichomo ndani ya pochi. Alijiuliza ni nini hicho na thamani yake.

Mungu alikuwa upande wao, wakampata. Mwanamke alimnyooshea Lee kidole na kumnong’oneza kuwa ndiye wanayemtafuta.

“Naomba vitu vilivyokuwemo kwenye hii pochi,” Lee alienda moja kwa moja kwenye mada akiwa anamtazama mlengwa wake: mwanaume mwenye mwili kiasi, mweusi na nywele nyingi zilizo hovyo.

Mwanaume yule akaleta nyodo. Akasema vyote vilivyokuwemo amevitupa maana hakuona kama vina umuhimu. Lee akakasirika sana, lakini mwanamke yule akamvutia kando na kumsihi:

“Usianzishe ukorofi hapa. Niachie hiyo kazi n’takufanyia pasipo kutoa jasho.”

“Ndani ya muda gani?”

“Nipe siku moja tu.”

Lee pasipo kuaga, akaondoka zake baada ya kumkata jicho mwanaume yule ambaye alikuwa tayari ameshaita jamaa zake kwa ajili ya shari. Alimwacha mwanamke aliyekuja naye hapo asionekane kama aliyepotea.

Akasonya kabla hajakanyaga pedeli ya mafuta.


***


Saa mbili asubuhi …


“Nitakuchek baadae,” Jona alituma ujumbe mfupi kwenda kwenye namba aliyoitunza kwa jina la Jumanne. Akaweka simu kando na kupasulia mayai mawili kwenye frampeni.

Alikuwa amevalia bukta ya bluu akiwa kifua wazi. Akili yake ilikuwa inawaza mambo kadhaa, la kwanza juu ya usalama wake. Na pia juu ya Miriam wa mheshimiwa Eliakimu.

Alikuwa ametenga siku hiyo mahususi kwa ajili ya kupembua, kupanga na kuamua juu ya hatma ya maisha yake kutokana na yanayoendelea kwani hata kipofu angelijua ya kwamba kwa sasa yupo vitani.

Alikaanga mayai yake akayala pamoja na sharubati. Bado akiendelea kutafakari. Akatathmini maisha yake na tathmini hiyo akaenda kuirejelea kwenye makaratasi yake meupe anayotumia kuchora. Hapo akaandika na kuchora kila ambalo lilikuwa linazingira maisha yake.

Kuanzia sakata la kifo cha mke na mtoto wake, biashara yake kufa, picha, Eliakimu, Miranda na Kinoo, Bigo, na mauaji yale yote aliyopata kukumbana nayo. Je vitu hivyo vitakuwa vina mahusiano? Akajiuliza na nafsi yake.

Akachoropoa chupa kubwa ya mvinyo alafu akagida akiendelea kutafakari. Mwishowe alipomaliza chupa nzima, akapitiwa na usingizi baada ya kichwa kuwa kizito.

Alipokuja kuamka yalikuwa majira ya jioni, na simu yake ilikuwa na jumbe nne, tatu toka kwa Miriam na moja toka kwa Jumanne. Kabla ya kusoma jumbe hizo akaoga, alafu akavaa na kutoka ndani mpaka baa iliyokuwepo karibu.

Akaagiza maji makubwa tu, alafu ndipo akatoa simu na kuanza kuhangaika nayo.

“Am in Dar,” (Nipo Dar) alituma ujumbe kwenda kwa Miriam. “Where are you now? When shall we meet?” (Upo wapi saa hii? Lini tutakutana?”)

Hakutaka kungoja. Alitaka sasa kufanya mambo haraka aone matokeo yatakuwaje. Hakuona haja ya kungoja ngoja kuumiza tumbo.

Alipotuma ujumbe huo, akaufungua na ujumbe wa Jumanne.

“Mbona kimya? Kuna mtu amekuja kukuulizia hapa?”

“Nani huyo?” Jona akatuma ujumbe kuuliza.

“Hajajitambulisha,” Jumanne akajibu. “Ni jamaa fulani hivi mwembamba.”

“Alikuja na usafiri?”

“Sijajua. Sikumwona na usafir”

Jona akajiuliza juu ya mtu huyo. Inawezekana akawa ndiye yule anayetaka kummaliza? Akajikuta anatikisa kichwa. Wa kwanza alikuwa Bigo, na sasa huyu.

Suluhisho siyo kummaliza, bali kuukata mzizi kabisa. Endapo akifanikiwa kummaliza huyo anayemtafuta, bado atatumwa mwingine … na mwingine na mwingine. Basi kwakuwa Miranda na Kinoo wanafahamu kuhusu hawa watu, hana budi kuwawahisha kaburini upesi.

Akanywa maji yake. Muda si mrefu, akapokea ujumbe toka kwa Miriam. Alikuwa amefurahi sana kusikia taarifa ya ‘mtu’ wake kuwapo Dar es salaam. Wakaongea kidogo na akajieleza wapi alipo, wakapanga pia pa kukutania.

“I think tomorrow I’ll be free.” (Nadhani kesho nitakuwa huru.) aliandika Jona. Akapata uhakika wa kuonana Miriam.

Baada ya hapo akampigia simu Miranda na kumtaka waonane kesho yake jioni kwani kuna jambo la kuliongelea na kuliweka sawa.


-----


Siku iliyofuata, Lamada hotel, majira ya saa sita mchana.


Jona alikuwa tayari ameshampanga Miriam kwamba wakutane hapo. Miriam alifika hapo hotelini na gari nyeupe Nissan Murano akiwa amevalia suruali ya kitenge. Karibu na mabwawa ya kuogelea, akaketi hapo na kuanza kuteta na Jona kwa kupitia simu.

Hakufahamu kwamba Jona alikuwa tayari ameshafika eneo hilo, na alikuwa anamtazama.

Baada ya muda mchache Jona akajitokeza na kusogea papo baada ya kuhakikisha kwamba Miriam alikuwa mwenyewe, hamna kampani. Akaketi na kujitambulisha kwa jina la Roden, na kitambulisho cha polisi akatoa kotini.

“Usijali, na wala usihofu. Sina haja wala nia ya kukuumiza,” akasema Jona akimtazama Miriam ambaye uso wake ulikuwa mweusi kwa hofu. Hata mwili wake ukitetemeka.

Jona akasema ametumwa na Eliakimu na yupo pale kwa lengo moja tu, la kumtwaa na kumpeleka huko. Miriam akatikisa kichwa upesi, akamwomba Jona kumwachia huru kwani kumpeleka kwa Eliakimu ni sawa na kumpeleka kwenye domo la simba mwenye njaa.

“Nipo radhi kwa lolote ila si kunipeleka huko. Nakuomba, nipo chini ya miguu yako.”

Hii ikawa fursa adhimu sana kwa Jona kutimiza malengo yake. Akaanza kumpeleleza na kumdadavua Miriam kwa undani. Akahakikisha anapata kile ambacho Eliakimu anamficha.

Alimtaka Miriam afungue simu yake na kumkabidhi. Miriam akafanya hivyo na kinyume na matarajio yake kwamba Jona ataenda kwenye uwanja wa ujumbe, mwanaume huyo akaenda mtandaoni na kupakua kitu fulani na kukitunza kwenye simu ya Miriam. Kisha akairejesha simu na kuendelea na maongezi.

Tukio hilo lilichukua sekunde ishirini tu kisha akaendelea na maongezi.

Lakini wakiwa katikati ya maongezi hayo, Jona akasikia sauti ya kike nyuma yake ikinong’oneza kumwamuru asimame akiwa amenyoosha mikono juu! Haikujulikana ni wapi mwanamke huyo ametokea.

Kwa ustadi mwanamke huyo aliambaa na ukuta na kuhakikisha hagundulikani na yeyote yule. Nywele zake ndefu za bandia zilizozonga uso wake ukijumlisha pia na miwani ya macho, haikuwa rahisi kumng’amua.

Miriam alimwona mwanamke huyo ila alidhani ni mpita njia. Kumbe alikuwa Nade, na ndani ya koti la zambarau alilolivaa alikuwa ameweka bunduki yake ndogo ambayo kwa sasa mdomo wake ameuminyia kwenye mbavu za Jona. Bado bunduki akiwa ameifichia ndani ya koti.

Haraka akampekua Jona na kubeba bunduki yake kisha akamtaka asogee mbali na Miriam asogee upande wake haraka. Matukio hayo yakafanikiwa ndani ya muda mchache mno! Nade akatoka na Miriam ndani ya hoteli.

Wakajipaki ndani ya gari, wakayoyoma! Jona akawatazama namna wanavyoishilia. Akatabasamu na kusema:

“Kama ilivyopangwa.”

Nade pasipo kujua alikuwa ametanguliwa hatua mbili mbele.
.
.
.
***
 
You must log in or register to reply here.

Our Community

Regional Communities

Back
Top Bottom
Menu
Forums
New posts
Log in
Register