BARAKA HUTOKA KWA BABA, LAANA HUTOKA KWA MAMA! UTAAMUA MWENYEWE!
Anaandika, Robert Heriel,
Mwanafalsafa.
Utaamua mwenyewe, utapima na kuamua maisha yako mwenyewe.
Baba ndiye mungu wa dunia, utake usitake, Mama ni msaidizi wa Baba upende usipende. Endapo hili halitatokea maisha ya mtoto huwa mashakani. Mtoto akigombana na Baba hukosa baraka, hata hivyo Baba hawezi kumlaani mtoto, Baba yu atoa baraka tuu, hana nguvu katika laana.
Mtoto akigombana na Mama hapo huchukua Laana, mama ndiye mwenye uwezo wa kutoa laana katika huu ulimwengu ikashika pasipo kizuizi. Lakini pamoja na umuhimu wa Mama hapa duniani lakini kamwe hana uwezo wa kumbariki mtoto aliyemzaa, hana mamlaka na hata akimbariki mara elfu moja mtoto hawezi kupata baraka hata moja. Labda sieleweki. Lakini mtanielewa tuu.
Unapoishi na wazazi lazima uelewe kila mzazi anamajukumu yake, anamipaka yake, ipo nafasi ya mama ambayo kamwe baba haiwezi ku-cover, lakini pia ipo nafasi ya Baba ambayo mama hata apinduke vipi kamwe hawezi kui-cover. Hata hivyo Mama anaweza beba majukumu karibu yote ya Baba na akayafanya kwa usahihi kabisa lakini jukumu la kumbariki Mtoto kamwe Mama hawezi kuli-Cover.
Kuna mtu anaweza akasema, mbona kuna watoto waliolelewa na Mama pekee, wakagombana na Baba zao, wakawatukana Baba zao, na bado wamefanikiwa kwenye maisha; Ukweli ni kuwa unaweza ukawa umefanikiwa kwenye maisha lakini maisha yako yasiwe ya baraka. Lazima ujue kutofautisha mafanikio na Maisha ya Baraka, aliyebarikiwa. Unaweza ukakuta mtu kafanikiwa lakini ni shoga, teja, anaharibu wanawake kwa kulala nao kama mnyama, amefanikiwa katika maisha lakini maisha yake hayana baraka kwa jamii.
Huwezi mkuta mtu aliyebarikiwa na Baba yake akawa na matatizo ndani ya jamii, hilo halijawahi kutokea na halitakuja kutokea kamwe.
Watoto wa zama hizi, najua mazingira ya karne hii ni magumu, huenda mama yako alitelekezwa akiwa na mimba yako, huenda Baba yako alikukataa, huenda Mama yako alifukuzwa na Baba yako, au sababu yoyote ile ambayo inakufanya usiwe karibu na Baba yako, inakufanya mchukie Baba yako, leo Taikon nakuambia kuwa, huyo ndiye Baba yako, huyo ndiye mwenye uwezo wa kukubariki ukapata baraka, huyo ndiye mungu katika nafasi ya hapa duniani, huyo Mama yako ni msaidizi wa huyo Baba yako tuu, atakupa kila kitu lakini kamwe hawezi kukupa baraka.
Lazima ujifunze kumheshimu Baba yako hata kama humjui, lazima ujifunze kumheshimu hata kama humuoni, heshima ndio ufunguo wa baraka zako katika maisha. Jamii zote duniani zilizoendelea na zilizostaarabika zinajua jambo hili, hata kama Baba atakuwa na mapungufu makubwa kiasi gani lakini huyo ndiye Baba, mungu mdogo aliyeshikilia dunia yako.
Kumkataa Baba ni sawa na wale wanaojiita Atheist, wasiomuamini Mungu, wasiotaka kutambua uwezo wa Mungu, lakini wanatambua uwepo wa Mama Dunia wanayemuona, Mama dunia anaweza kukupa yote lakini kuna mambo ya msingi kamwe hawezi kukupa. Uhai na baraka kamwe dunia haiwezi kukupatia.
Nisiandike sana, kuwachosha nafikiri nilichokuwa nataka kukisema mumekielewa, Msidanganywe na hawa wanawake ambao baadhi yao wanachuki na Baba zenu, tambueni kuwa wanawagombanisha na watu muhimu ambao ndio wenye uwezo wa kuwabariki mkabarikiwa, Wapendeni Mama zenu, lakini waheshimuni Baba zenu, nafikiri nimeeleweka.
Wababa nanyi mtambue kuwa hamna uwezo wowote wa kumlaani mtoto na laana ikashika, hakuna kitu kama hicho duniani,
Baba unachoweza kukifanya ni kutoa baraka. Wamama nanyi mtambue kuwa hamna uwezo wowote wa kubariki hata muwakumbatie watoto wenu kama dhahabu, mnachoweza ni kutoa laana ikashika. Hilo kila mmoja aliweke akilini.
Mwisho; Kwa mustakabali mwema wa watoto lazima Mama na Baba muwe kitu kimoja, muwajenge watoto katika misingi mema, mkijua kuwa bila ninyi wawili maisha ya mtoto yapo hatarini,
Robert Heriel
Taikon wa Fasihi
Kwa sasa Dar es salaam.