Kylian Mbappé, mmoja wa wachezaji bora zaidi wa soka duniani, amekuwa katika hali ngumu tangu kujiunga na Real Madrid akitokea PSG. Licha ya uzoefu wake mkubwa na uwezo wake wa kuamua mechi, amekuwa akipitia kipindi kigumu cha kutengeneza matokeo katika timu yake mpya.
Kuhama kutoka klabu kubwa kama PSG kwenda Real Madrid ni mabadiliko makubwa. Mbappé anakabiliwa na changamoto ya kuzoea mfumo mpya wa uchezaji, wachezaji wapya, mahitaji tofauti ya klabu pamoja na falsafa ya mpira pale Santiago Bernabeu.
Jambo jingine ni kutokana na umaarufu wake na bei kubwa ya uhamisho wake, kuna matarajio makubwa kutoka kwa mashabiki, waandishi wa habari, na klabu yenyewe. Shinikizo hili linaweza kuathiri utendaji wake kwa kumfanya ajitazame kama ana deni kubwa juu yake.
Ni wazi kuwa Mbappé bado anaonekana kutokuwa na uelewano kamili na wachezaji wenzake, hasa katika masuala ya pasi za mwisho na katika muunganiko wa mashambulizi yao, mara kadhaa Mbappé amekuwa akijikuta kwenye kuotea pasipo kufahamu.
Kocha wa Real Madrid, Carlo Ancelotti, amekuwa akimtumia Mbappé katika nafasi tofauti, ikijumuisha nafasi ya namba 9 na winga. Mabadiliko haya ya mara kwa mara yanaweza kuathiri uwezo wake wa kucheza kwa ufanisi.
Kwa sasa Mbappé anapaswa kuongeza muda wa mazoezi na wachezaji wenzake ili kuimarisha uelewano wao kimbinu. Hii itampa fursa ya kuelewa mitindo ya uchezaji ya kila mchezaji na kuunda ushirikiano wa ufanisi.
Pia Mbappé anapaswa kujiamini na kuzingatia mchezo mmoja baada ya mwingine. Na aelewe kuwa moyo wake kwa sasa upo Madrid na sio Paris tena.
Mbappé anapaswa kuacha tabia ya uchezaji wa mtu binafsi na kuzingatia kuwa sehemu ya timu. Kushiriki katika kutengeneza pasi za mashambulizi, na kuunga mkono wachezaji wenzake kunaweza kusaidia timu nzima kwa kiasi kikubwa.
Mbappé anapaswa kushirikiana na kocha wake, Carlo Ancelotti, ili kuelewa mahitaji ya timu na falsafa pamoja na kujiboresha katika maeneo ambayo yana uhitaji huo.
Mbappé amekuwa na mwanzo mgumu katika Real Madrid, bado ana uwezo wa kuwa mchezaji muhimu kwa timu. Ni muhimu kukumbuka kuwa mabadiliko makubwa yanaweza kuchukua muda.
Mbappé anapaswa kuwa na subira na kuendelea kufanya kazi kwa bidii. Game ya jana tumepoteza ila tuna game nyingine mkononi, tukaze kamba za viatu wanaume.