Mbunge wa Maswa Mashariki, Dkt. George Venance Lugomela, amesema maisha ya ubunge si rahisi kama wengi wanavyodhani, akidai kuwa wabunge wengi wanakabiliwa na changamoto za kifedha isipokuwa wale wanaoshika nafasi za uongozi kama Spika, Naibu Spika au Wenyeviti wa Kamati za Bunge.
Akizungumza katika video, Dkt. Lugomela alisema kwa hali aliyonayo kwa sasa amefikia hatua ya kushindwa kumudu baadhi ya majukumu ya kifamilia, ikiwemo kulipa ada za watoto wake katika shule za gharama.
"Natujia kuwa mbunge, bungeni tunakula msoto. Labda uwe Spika, Naibu Spika au Mwenyekiti wa Kamati. Mimi naona bora ningebaki kwenye ukurugenzi, au kama ingewezekana nirudi kwenye ajira. Bora hata niwe afisa wa kawaida kuliko ubunge," alisema Dkt. Lugomela.
Mbali na kauli hiyo, mbunge huyo alidai kuwa hali yake ya kifedha kwa sasa imemfanya ashindwe hata kulipa ada za watoto wake katika shule za gharama, akitumia hali hiyo kuelezea changamoto anazodai kukutana nazo tangu alipokuwa mbunge.
Kauli za Dkt. Lugomela zimeibua mjadala miongoni mwa wananchi na wadau wa siasa kuhusu hali halisi ya maslahi na mazingira ya kazi kwa wabunge nchini.