Ni kweli kabisa kama Yesu alivyoahidi katika Yn 14:13-14 tukimuomba Mungu jambo lolote tutapewa au tutafanyiwa. Nimethibitisha hilo mimi mwenyewe. Niliomba pesa ya kujenga nyumba na kununua gari nikapata - nilikuwa na kazi ya mshahara mdogo nikapata kazi yenye mshahara karibu mara kumi ya huo wa mwanzo! Niliomba mwenzi mzuri wa ndoa ninaye. Niliomba nifanikiwe kibiashara-wateja napata! Mungu amenipa maarifa na kunifanyia mambo mengi ambayo kwa akili zangu au kwa njia za kawaida nisingeweza kuyapata. Muda hautoshi kuyaeleza yote hapa.
Inawezekana umekuwa ukimuomba Mungu jambo fulani kwa muda mrefu hujapata. Usikate tamaa. Zingatia vigezo na masharti yafuatayo, hakika Mungu hana upendeleo, atakufanyia:
1. Omba kwa imani
"Lakini na aombe kwa imani, pasipo shaka yo yote; maana mwenye shaka ni kama wimbi la bahari..." (Yakobo 1:6)
2. Omba sawasawa na mapenzi ya Mungu
"Na huu ndio ujasiri tulio nao kwake, ya kuwa, tukiomba kitu sawasawa na mapenzi yake, atusikia."
(1 Yohana 5:14)
3. Tii amri za Mungu
"Na yo yote tutakayoomba tutapokea kwake, kwa kuwa tunazishika amri zake..." (1 Yohana 3:22)
4. Omba kwa Jina la Yesu
"Na chochote mtakachoomba kwa jina langu nitafanya.." (Yohana 14:13)
5. Usiwachukie waliokukosea. Wasamehe kabla hujaanza maombi
"Na kila msimamapo kuomba, sameheni..." (Marko 11:25)
6. Usichoke kuomba. Omba kwa bidii mpaka upate
"Ombeni bila kukoma." ( Wathesalonike 5:17)
Kuomba kwake mwenye haki kwafaa sana, akiomba kwa bidii (Yak 5:16)
7. Usiombe kwa ajili ya tamaa zako - kwa mfano, usiombe jambo fulani ili upate kisha ujionyeshe kuwa wewe ni bora kuliko wenzako
"Mnaomba wala hampati kwa sababu mnaomba vibaya, ili mpate kutosheleza tamaa zenu."
(Yakobo 4:3)
8. Funga na kuomba. Mambo mengine yanafanyika ukiongeza "gia" ya maombi(kufunga)
"Lakini namna hii haitoki ila kwa kusali na kufunga." (Mathayo 17:21)
9. Omba kwa Roho
"...Nitaomba kwa roho, na pia nitaomba kwa akili yangu." (1 Wakorintho 14:15)
10. Usitende dhambi. Dhambi ni kikwazo kikubwa cha kujibiwa maombi. Hivyo, tubu dhambi zako, na kuziacha kabla hujaanza kuomba. Watu waliookoka na wanaoishi maisha matakatifu wana nafasi nzuri ya kupewa lolote wanaloliomba.
"Lakini maovu yenu yamewatenga ninyi na Mungu wenu, na dhambi zenu zimeuficha uso wake msiuone, hata hataki kusikia." (Isaya 59:2)
Anayekataa kuisikia sheria, huyo hata sala yake ni chukizo kwa Mungu." (Mithali 28:9)
