Nawasalimu wanabodi wa JamiiForums
Usiku wa kuamkia leo akili yangu ilinigomea kupata usingizi na hivyo kukaa macho almost the whole night. Nilikuwa nikimkumbuka mtu jasiri na mpambanaji wa kutetea haki za binadamu na ustawi wa demokrasia nchini Zimbabwe.
Alikuwa ni mtu aliyejitolea maisha yake ili hatimaye wengine waje kuishi maisha ya raha na amani hata kama yeye hatokuwepo duniani. Namzungumzia Morgan Tsvangirai wa chama cha Movement for Democratic Change, MDC aliyefariki Afrika Kusini miaka mitatu iliyopita kwa ugonjwa wa saratani ya utumbo.
Morgan alikuwa ni mwiba mkali mbele ya macho ya dikteta Robert Mugabe tangu akiwa kiongozi wa chama cha wafanyakazi hadi alipoanzisha MDC kuendeleza mapambano dhidi ya utawala wa kifashisti ya ZANU-PF ya Mugabe iliyojaa dhulma, ufisadi, kujuana, utekaji, utesaji kwa waliomkosoa dikteta Mugabe na ushetani mwingine kama ilivyo kwa Serikali ya CCM.
Upambanaji wa Morgan kwa utawala wa ZANU-PF ya dikteta Mugabe umesheheni simulizi za kusisimua sana. Kwamba hata alipoteuliwa kuwa Waziri Mkuu kama hatua ya kumtaka "astaafu" upambanaji bado hakukubali kusaliti wazalendo. Morgan hakuwa mwoga na kamwe hakushikwa na hofu ya kuuawa na Mugabe. Na hiyo ilimfanya asikimbie nchi yake kwenda Uropa. Alikuwa tayari kufa nchini Zimbabwe kuwapigania wananchi waliokuwa wakionewa na Serikali katili ya Mugabe.
Baada ya Mugabe kuvifungia magazeti yaliyokosoa Serikali yake, aliviamuru yaliyosalia kumtangaza Morgan kama kibaraka wa wazungu asiye na nia njema na Zimbabwe lakini bado Tsvangirai hakukata tamaa.
Sina kumbukumbu ni mara ngapi Morgan alilazwa rumande na kupigwa na Wana usalama vibaraka wa Mugabe maana picha za Morgan zikimuonesha akichuruzika damu zimetapakaa katika maktaba mbalimbali duniani.
Mugabe alijaribu hata kumhonga vyeo na pengine ofa ya vyeo na fursa za biashara lakini dunia imeandika historia kuwa alivikataa kuwapambania Wazimbabwe.
Ukweli uliokodoa macho ni kwamba mchango wa Morgan ni mkubwa sana katika kumwondoa Mugabe madarakani. Ndiyo, maana jiulize wale makamanda wa Mugabe walipata wapi ujasiri wa kumwambia "bosi" wao aondoke ofisini? Wale vijana wa "UVCCM" wa Zanu-Pf walipata wapi ujasiri wa kuunga mkono maandamano ya kumng'oa dikteta Mugabe madarakani? Ukweli ni mbegu ya ujasiri alioupanda Morgan kwa wananchi wa Zimbabwe.
Hata Rais Mnangagwa aliingiwa na woga hivyo kukimbilia ughaibuni baada ya kubaini kukamilika kwa mpango wa kumuua uliopangwa na mke wa Mugabe, Grace lakini Morgan alisalia Zimbabwe kupanda mbegu ya ujasiri na akafanikiwa.
Nikikumbuka haya ya Morgan nasononeshwa na hali ya Upinzani Tanzania. Tundu Lissu amenukuliwa akisema, "Watanzania hawajawa tayari kwa mabadiliko kukiondoa CCM madarakani". Najiuliza ni lini Lissu amepanda mbegu ya ujasiri wa kukiondoa CCM ya Magufuli madarakani? Ni lini Lissu amepanda mbegu hiyo kwa vyombo vya usalama vinavyokilinda CCM madarakani? Kwa nini Lissu aliahidi kutupeleka barabarani akaishia kujipeleka ubalozini kwa woga na hofu ya kuuawa na vyombo vya usalama alivyodai?
Unajiuliza hivi Tanzania nani hasa ni kinara na alama ya Upinzani aliyetayari "kufa" kwa ajili ya umma mpana. Kenya wanaye Raila Odinga, Uganda wanaye Kiiza Besigye na Bobi Wine, Afrika Kusini wanaye Julius Malema nakadhalika. Tanzania tunaye nani? Mdee, Sugu, Lema, Heche, Mbowe, Zitto, Membe, Rungwe, au nani?
Kwa mbali alionekana Lissu angechukua nafasi hiyo lakini naye amejawa hofu na woga kana kwamba katika Afrika demokrasia, haki za binadamu, uhuru wa vyombo vya habari, uhuru wa kujieleza, Katiba bora nakadhalika ni Mambo ya kuletwa na watawala kama bakuli la dengu mezani.
Wanajisahaulisha kuwa Mambo hayo hupiganiwa katika majukwaa ya siasa bila kujali maslahi binafsi na matumbo. Ni vita inayogharimu damu, jasho na mateso. Morgan hakufikiri wala kusubiri kuwa mageuzi yangeletwa na dikteta Mugabe. Alipambana. Hakuogopa "kushughulikiwa" kama wapinzani wetu.
Wakati Lema akitimkia Kenya na familia yake akidai nayo inaweza kuumizwa, Morgan aliwahi kuchomewa nyumba na kila kitu ndani lakini alipopata nafasi ya kuongea na media akisema, "nimepoteza kila kitu ndani ya nyumba lakini sijapoteza chochote kwa Wazimbabwe maana ukombozi uko mlangoni."
Leo Wazimbabwe wanafurahia maisha yasiyo na vituko vya Mugabe na mkewe Grace lakini jasiri Morgan ametangulia kaburini. Huo ndio Upinzani wa kweli. Kupanda mbegu ya ujasiri si lelemama. Linahitaji kujitoa mhanga si kukimbia. Tumebaki na wapinzani wa mitandaoni. Inasononesha sana!!!
Nawatakia mapumziko mema.