UKITAKA NDOA YAKO IWE YA FURAHA, ZINGATIA KANUNI YA MFANANO
Kwa Mkono wa Robert Heriel
Andiko hili nimeliandika kuisaidia jamii hasa kuponya fikra za wale ambao bado hawajaoa/kuolewa. Bila shaka andiko hili litakusaidia kwa sehemu kubwa ikiwa utalizingatia.
Moja ya makosa makubwa yanayofanywa katika zama hizi iwe kwa makusudi au kwa bahati mbaya, ima kwa kujua ama kwa kutojua ni kuipa nguvu dhana isemayo; "Wanadamu wote ni sawa"
Dhana ya wanadamu wote ni sawa kwa sasa imetawala ndani ya jamii, na athari zake ni dhahiri katika nyanja zote za maisha. Hata hivyo leo nitazungumzia athari hizi katika nyanja za mahusiano haswa katika NDOA na FAMILIA.
Kwanza ifahamike kuwa wanadamu hatupo sawa. Tunatofautiana kwa kiasi kikubwa, hata hivyo utofauti huo unaunda makundi ya watu miongoni mwa wanadamu.
Hata hivyo sipuuzi baadhi ya mambo ambayo wanadamu wapo sawa, mathalani mahitaji ya muhimu yamfanyayo mwanadamu kuishi.
Utofauti wa mwanadamu upo katika maeneo nyeti yafuatayo;
1. Utofauti wa Kifikra, kimtazamo, kihisia, kitabia
2. Utofauti wa Kimaumbile kama Rangi, kimo nk
3. Utofauti wa kinasaba nk
Tofauti hizo ndizo huunda makundi ya watu.
Kizazi cha sasa kinalazimisha kuwa watu wote ni sawa. Sio ajabu mtu masikini kujiona sawa na mtu tajiri. Hata hivyo tajiri hawezi jiona sawa na masikini.
Mtu mjinga kujiona sawa na mtu mwerevu, hata hivyo mwerevu hawezi jiona sawa na mjinga.
Muafrika kujiona sawa na Mzungu, angali Mzungu hawezijiona sawa na Muafrika.
Mwanamke kujiona sawa na mwanaume, hata hivyo mwanaume hajawahi kujiona sawa na mwanamke.
Siku zote unapolazimisha ufanano unatengeneza mazingira ya UNYANYASAJI NA UBAGUZI. Huwezi jilinganisha au kujifananisha na kitu ambacho hufanani wala kulingana nacho alafu ukabaki salama, lazima utanyanyaswa na kubaguliwa.
Unyanyasaji na ubaguzi utaisha pale watu watakapoacha kujiona wapo sawa kumbe hawafanani wala hawalingani.
Nataka kusema nini hapa?
Mtu unapotaka kuoa/kuolewa lazima uzingatie zaidi kundi lako. Lazima ujitathmini na kujitambua kuwa wewe ni nani. Ili uweze kumpata mwenza anayeendana na kufanana na wewe.
Huwezi mpata mwenza bora ikiwa hujajitathmini na kujitambua.
Unakuta msichana kwao ni masikini na fukara lakini anahangaika kutafuta mume tajiri. Huku ni kutafuta kunyanyaswa au kubaguliwa iwe direct au indirect.
Unakuta kijana ni masikini na fukara lakini anatafuta mke mwenye pesa. Hahaha! Ndugu unatafuta machafuko wala sio ndoa.
Unatafuta kijana hana mvuto lakini anahangaika kutafuta wanawake wazuri. Huko ni kutafuta machafuko ndani ya maisha yako. Hata uwe na Pesa aje huwezi oa mwanamke ambaye hamfanani ukabaki salama.
Oa/olewa na kundi lako acha kujipendekeza kwa makundi ya watu wengine, utateseka nakuambia labda uwe mbishi.
Unakuta mwanamke ni hana mvuto lakini anatafuta vijana wazuri/ handsome boy. Huku ni kutafuta lawama tuu. Hata uwe mwanamke mwenye pesa, huwezi olewa na mwanaume ambaye sio kundi lako alafu ukasalimika.
Huna pesa tafuta asiye na pesa mwenzako kama unataka kweli maisha ya furaha. Kisha tafuteni pesa wenyewe.
Lakini unatafuta wenye pesa wakati wewe ni apeche alolo hakika nakuhakikishia lazima utalipia, utahenyeka.
Mtu hata akifilisika atakutupia wewe lawama kuwa wewe ndio umeleta mikosi ndani ya maisha yake.
Huna elimu tafuta asiye na elimu mwezako sio huna elimu alafu unakimbilia kutafuta mwenza mwenye elimu, uliona wapi mambo haya kama sio kutafuta lawama kwa MUNGU wako.
Mtu hamfanani kimtazamo, kihisia, kifikra, kiupeo, unataka awe mwenza wako alafu baadaye unalalamika unanyanyaswa au unabaguliwa bado ujione upo sawa kichwani.
Ukiwa mlevi tafuta Mlevi mwenzako. Sasa wewe unajijua hunywi pombe alafu unatafuta mnywa pombe unatafuta lawama ndugu yangu. Hamfanani, hakuna upendo hapo.
Upendo ni mfanano na mlingano wa kihisia, kimwili, kiroho, na kiakili baina ya watu wawili ambapo wakiungana huwa kitu kimoja.
Hakuna upendo wa vitu vinavyotofautiana.
Wengi hujidanganya kuwa UPENDO unaweza kuunganisha watu wasiofanana jambo ambalo ni uongo na ulaghai wa mchana kweupe.
Mara nyingi wanaosema mimi nampenda hata kama ni Mlevi, masikini, anapesa kunishinda, nk wengi huishia kuteseka maisha yao yote na kuyajutia.
Mwanzoni wanaanzaga vizuri kabisa lakini Nature huamua mwishoni na kuwafanya wawe paka na panya.
Hata hivyo mambo haya huenda mpaka kwa watoto, sio ajabu mtoto akajisikia vibaya kuwa na mzazi kama wewe. Hujawahi kusikia Watoto wakimuuliza Mama yao kuwa hivi ni jambo gani lililokufanya umpende Baba? Hujawahi kusikia hayo.
Tafsiri yake ni kuwa wanaona Kuwa mama hakustahili kuolewa na Baba yao.
AU unashangaa mtoto anamuuliza Baba, hivi ni kipi kilikufanya umuoe Mama? Japo hii ni mara chache kutokea.
Lakini mkiwa mmeoana mnaofanana na kulingana kwa mambo mengi huwezi kuta maswali kama hayo kwani hata watoto wenyewe watakuwa wanafanana na ninyi kwa kiasi kikubwa.
Kuolewa/kuoa mwenza msiyefanana au kulingana ni kuyafanya maisha yako kuwa MATEKA.
Ndio maana vitabu vya dini vinasema katika mwanzo
Mwanzo 2:18
"Bwana Mungu akasema, Si vema huyo mtu awe peke yake, nitamfanyia msaidizi wa kufanana naye."
20. Adamu akawapa majina yao kila mnyama wa kufugwa, na ndege wa angani, na kila mnyama wa mwituni; lakini hakuonekana wa kumsaidia Adamu ALIYEFANANA naye.
Ndoa ili iwe na Furaha lazima wenzi wafanane kwa kiasi kikubwa. Sio kwa vile tuu ni binadamu basi unadhani kila mwanadamu anaweza kuwa mke/mume wako hiyo sio sahihi kabisa.
Hata ukienda sokoni kununua viatu, sio kila kiatu unaweza kukivaa bali kiatu ambacho ni saizi yako, kinachokutosha.
Unakuta kijana anamaumbile madogo ya uzazi alafu anataka mwanamke mwenye maumbile makubwa ajabu hii. Tafuta mtu unayefanana naye.
Masikini kwa masikini
Tajiri kwa tajiri
Mjinga kwa Mjinga
Mcha Mungu kwa Mcha Mungu
Mlevi kwa mlevi
Asiye na elimu kwa asiye na elimu,
Huu sio ubaguzi bali ndio hali halisi.
Ubaguzi ni vile unaoa/kuolewa na mtu msiyefanana hapo lazima ubaguliwe hata ufanyeje.
Ndoa nyingi zinapumulia mashinde kwa sababu watu wameoana hawafanani wala kulingana.
Niishie hapa, nafikiri nilichotaka kueleza nimekieleza na kimeeleweka.
Robert Heriel
Taikon wa Fasihi
0693322300
Kwa sasa Morogoro