Bunge la Kitaifa limepitisha Mswada wa Marekebisho ya Sheria ya Michezo, 2026, unaolenga kukabiliana na visa vya kupanga au kuathiri matokeo ya mashindano ya michezo nchini Kenya.
Mswada huo, uliodhaminiwa na Irene Nyakerario Mayaka, unapendekeza kuweka sheria kali dhidi ya vitendo vinavyohatarisha uadilifu wa michezo na kuwaathiri wanamichezo wanaoshindana kwa haki.
Kwa mara ya kwanza, sheria inapendekeza kuweka ufafanuzi mpana wa “manipulation of a sports competition”, unaojumuisha kutoa au kupokea faida isiyostahili ili kuathiri matokeo ya mchezo, kupanga matokeo, kufanya makusudi vibaya ili kufanikisha matokeo fulani, pamoja na kutumia taarifa za ndani kwa madhumuni ya kubashiri.
Mswada huo pia unaipa Sports Kenya mamlaka zaidi ya kupokea ripoti za tuhuma za upangaji wa matokeo na kufanya uchunguzi kwa kushirikiana na taasisi husika, ikiwemo DCI. Uchunguzi huo unatakiwa kukamilika ndani ya miezi sita.
Mtu atakayepatikana na hatia anaweza kutozwa faini ya hadi Sh1 milioni, kifungo cha hadi mwaka mmoja, au adhabu zote mbili.
Mbali na adhabu za jinai, vilabu na wanamichezo wanaohusika wanaweza kukabiliwa na kupokonywa ushindi, kuondolewa kwenye mashindano au hata marufuku ya maisha kushiriki katika mashindano yanayosimamiwa kisheria.
Sheria hiyo pia inalenga kuhakikisha fedha au faida yoyote iliyopatikana kutokana na kupanga matokeo ya mashindano inachukuliwa na mamlaka.
Kwa wanamichezo na mashabiki, hatua hii inalenga kulinda uaminifu wa mashindano na kuhakikisha ushindi unaamuliwa na uwezo uwanjani, si mipango ya pembeni.
