Mkuu wa Wilaya ya Songwe, Nickson Simon John, Oktoba 8, 2026 alifanya kikao na Watumishi wa Makao Makuu ya Halmashauri ya Wilaya ya Songwe katika Ukumbi wa Sambila, akisisitiza umuhimu wa kujenga utamaduni wa kiutendaji unaozingatia matokeo na mahitaji ya Wananchi.
Akizungumza katika kikao hicho, Nickson amesema mafanikio yataamuliwa na utamaduni wa kiutendaji unaojengwa ndani ya taasisi, akiwataka Watumishi kufanya kazi kwa pamoja na kujenga mazingira yanayowezesha utekelezaji wenye matokeo.
Aidha, amewataka Watumishi kufikiri kimkakati na kuhakikisha wanaifanya Serikali kuwa taasisi inayokwenda na wakati, yenye uwezo wa kutambua changamoto, kuzitafutia majibu na kutoa huduma zinazokidhi mahitaji ya Wananchi.
Nickson pia amesisitiza umuhimu wa kuwa na uongozi unaolenga kuleta suluhu kwa matatizo ya Wananchi, akiwataka Watumishi kutumia nafasi zao, maarifa na rasilimali zilizopo katika kutatua changamoto na kuhakikisha kazi za Serikali zinakuwa na matokeo yanayoonekana kwa Wananchi.
Kikao hicho kimehudhuriwa pia na Katibu Tawala wa Wilaya ya Songwe, Bwana Godfrey Kawacha, pamoja na Mkurugenzi Mtendaji wa Halmashauri ya Wilaya ya Songwe, CPA Cecilia Kavishe.
