AJALI MBAYA YAMKUMBA HECHE, ZIARA YA “NO REFORM NO ELECTION” YASITISHWA KWA MUDA USIOJULIKANA
Na Mwandishi Wetu – Morogoro
Katika kile kilichoonekana kama pigo kubwa kwa harakati za kisiasa zinazolenga kudai mageuzi ya kweli kabla ya uchaguzi mkuu, Makamu Mwenyekiti wa Chama, Mheshimiwa John Heche, amenusurika kifo katika ajali mbaya ya gari iliyotokea leo asubuhi maeneo ya Msamvu, Morogoro.
Gari ya miziki iliyokuwa kwenye msafara wake ikielekea Kivukoni (Ulanga), Igima (Mlimba) na Ifakara Mjini (Kilombero) kwa ajili ya kuanza rasmi operesheni ya #NoReformsNoElection Kanda ya Kati, ilipata ajali ya kutisha na kupelekea viongozi waliokuwa ndani yake kujeruhiwa vibaya, akiwemo Mheshimiwa Heche mwenyewe ambaye ameripotiwa kuwa katika hali mahututi.
Kwa mujibu wa taarifa kutoka kwa mashuhuda na viongozi waliokaribu na msafara huo, Mheshimiwa Heche alivunjika vibaya miguu na mbavu katika ajali hiyo na kwa sasa amelazwa katika Chumba cha Wagonjwa Mahututi (ICU) katika hospitali ya Mkoa wa Morogoro, akisubiri rufaa kwenda Taasisi ya Mifupa Muhimbili (MOI).
Kiongozi wa gari hiyo, Bw. Twaha Mwaipaya, naye ameripotiwa kujeruhiwa na kwa sasa yupo chini ya uangalizi maalum wa madaktari.
Ajali hii imekuja wakati harakati za #NoReformsNoElection zilikuwa zimepamba moto, zikiwa zimekusudia kupeleka ujumbe mzito kuhusu umuhimu wa kuwepo kwa mabadiliko ya kisiasa na kisheria kabla ya Watanzania kurudi kwenye sanduku la kura.
Kwa sasa, operesheni hiyo imesitishwa kwa muda usiojulikana huku viongozi wa chama wakikusanyika Morogoro kupanga hatua za dharura na kuangalia hali ya kiafya ya kiongozi wao.
Wachambuzi wa mambo ya siasa wanasema tukio hili ni jaribio kubwa kwa nguvu ya upinzani nchini na linaweza kubadili mwelekeo wa mjadala wa kisiasa, hasa iwapo hali ya afya ya Mheshimiwa Heche itaendelea kuzorota.
Tutawaletea taarifa zaidi kadri tunavyozipokea kutoka kwa madaktari na timu ya chama iliyopo hospitalini.