Baada ya member wa JamiiForums kuripoti madai kuwa kuna Mlinzi wa Kanisa Katoliki la Sinza kutuhumiwa kumlawiti Mwanafunzi wa kiume anayesoma Darasa la Tano katika Shule ya Msingi Sinza ya Jijini Dar es Salaam, kuna mwendelezo wa taarifa hiyo.
Andiko hilo la awali lipo hapa -
Serikali imsaidie Mtoto huyu anayedaiwa kulawitiwa na Mlinzi wa Kanisa Katoliki Sinza
Muda mfupi baada ya andiko hilo kwenda hewani Wizara ya Maendeleo ya Jamii, Jinsia, Wanawake na Makundi Maalum, Dorothy Gwajima alitoa neno kwa kuweka ‘comment’ kuwa mama mzazi wa mtoto huyo amtafute ili kusaidia kushughulikia suala lake.
Mwendelezo wa simulizi huu hapa…
MAMA MTOTO ASIMULIA…
Siku ya tukio mwanangu alichelewa kurudi, hadi saa mbili kasoro usiku alikuwa hajarudi hali ambayo si kawaida yake, nikatoka kwenda kumtafuta, mara nyingi alikuwa akitoka shule au siku za wikiendi anaenda Kanisani.
Nilipokaribia kufika Kanisani nikaona kundi la watu limemzunguka mtu, nikasogea na kubaini kuwa aliyezunguka ni mwanangu.
Nilipohoji kulikoni nikaelezewa na mashuhuda kuwa wakati mtoto anatoka Kanisani aliingia chooni kujisaidia, ndipo huyo mlinzi akaingia na kumtishia kumpiga, akamtaka avue nguo, alipofanya hivyo akamgeuza na kuanza kumuingilia kinyume na maumbile.
Mwanangu alipopiga kelele kuna watu wakasikia hizo kelele wakiwemo watumishi wengine wa Kanisani hapo, wakaenda kutoa msaada, wakamkamata mtuhumiwa, ndipo nikakuta mvutano ukiendelea baadhi wakitaka suala hilo limalizike kienyeji kwa mazungumzo na wengine wakitaka lifike kwenye Vyombo vya Sheria.
Yule mlinzi mtuhumiwa hakukimbia alikuwepo eneo la tukio akijaribu kunibembeleza kuwa yeye hana kosa, nilikuwa na hasira na sikutaka hata kumsikiliza, akaenda kuzungumza na Paroko ambaye alipokuja akasema yeye hawezi kutoa majibu bali anaachia Polisi walishughulikie.
Nikawapigia simu Askari Polisi ambao walifika na kumchukua mtuhumiwa ndipo hatua nyingine zikafuata.
MWENDELEZO WA MASHTAKA…
Mama mtu anasema Mtoto alifanyiwa vipimo Hospitali ya Palestina na majibu yakaonesha kweli kaingiliwa kinyume cha maumbile.
Nilienda wiki iliyopita (mwishoni mwa Februari 2024) pale Kituo cha Polisi Mabatini nikakutana na Mpelelezi nikajulishwa kuwa suala hilo lipo kwa Mwanasheria, lakini nimekuwa nikijibiwa hivyo kila ninapoenda.
Mpaka sasa unapita mwezi sijui chochote kinachoendelea, mwanangu ameshaanza kwenda shule lakini uongozi wa shule sijaujulisha chochote kwa sababu nahofia isije ikamuathiri zaidi kisaikolojia.
Nilipoona JamiiForums mmeandika na Waziri Gwajima akasema mama mwenye mtoto amtafute, nilifanya hivyo, siku chache baadaye kuna maafisa wa Serikali walinitafuta na kuniunganisha na Afisa Ustawi wa Jamii wa Sinza anaitwa Grace.
Nilipoenda kuonana naye akaniambia nimuelezee ilivyokuwa nikamuelezea kila kitu akasema atashughulikia na kufikisha suala hilo kwa wakubwa.
Kinachonipa shaka na kuniuma ni kuwa kumekuwa na ukimya, nasikia mtuhumiwa yupo nje kwa dhamana, uongozi wa Kanisa pia haujanishirikisha wala kuzungumza nami kwa lolote na wala hawajanipa ushirikiano wowote.
Sijarejea kusali tena pale (Kanisani) ila kwenye Jumuia ya Kanisa naenda na huko nako hawajazungumza chochote kuhusu suala langu.
Mtuhumiwa namfahamu kwa jina moja tu anaitwa Baraka, sikuwa namjua kwa jina kabla.
Naomba Serikali inisaidie haki ipatikane kwa kuwa mwanangu wakati anakua alipata changamoto kidogo ya kuchelewa kuanza kuongea, hivyo mpaka leo yupo darasa la tano bado kidogo uwezo wake wa kujieleza sio mkubwa kama ilivyo Watoto wengine, inawezeka mlinzi aliona atumie udhaifu huo kumfanyia mwanangu ukatili.
AFISA USTAWI WA JAMII
Grace Ludovic ambaye ni Afisa Ustawi wa Jamii wa Sinza, anaelezea: Nilizungumza na mama mtoto akaniambia suala lake linaendelea na upelelezi kwa kuwa suala kama hilo lazima lifike kwa DPP.
Leo hii (Machi 4, 2024) ninatarajia kwenda Kituo cha Polisi Mabatini kujua kinachoendelea.
Kuhusu mtuhumiwa hatujazungumza naye, nilienda Kanisani sikufanikiwa kukutana na uongozi niliwakuta walinzi, hivyo nikashindwa kumhoji.
Mtuhumiwa yupo nje kwa dhamana, Polisi wanasema ni haki yake Kisheria, anaishi wapi? Hilo sijui kwa sasa.
KAMANDA WA POLISI KINONDONI…
Akizungumzia suala hilo, Kamanda wa Polisi Mkoa wa Kinondoni, Mtatiro Kitinkwi amesema “Faili la kesi lilipelekwa Ofisi ya Wakili wa Serikali kwa Hatua za mashtaka, linafanyiwa kazi, kuanzia sasa hatua zinaenda kuchukuliwa, isichukuliwe kuwa kuna kitu kinakwamisha.”