Mahakama ya Tanzania inapenda kuwatangazia umma kwamba Shauri la Jinai Namba 8606/2025 na namba 8607/2025 kati ya Jamhuri na Tundu Antiphas Lissu ambayo yamepangwa kutajwa na kusikilizwa kesho Jumatatu tarehe 2 Juni, 2025 katika Mahakama ya Hakimu Mkazi Dar es Salaam Kisutu, pamoja na kwamba Mshtakiwa atafikishwa Mahakamani, lakini mwenendo wote wa Mashauri haya, utarushwa mubashara (live).
Lengo la Mahakama kurusha mubashara matangazo ya mwenendo wa mashauri haya ni kuwawezesha Wananchi popote pale walipo na ambao wanapenda kufuatilia mwenendo wa mashauri kuweza kufuatilia bila kuwa na ulazima wa kufika Mahakamani. Aidha, hatua hii ni sehemu ya utekelezaji wa Mpango Mkakati wa Mahakama ya Tanzania, ambao unalenga kuimarisha uwazi, uwajibikaji na matumizi ya teknolojia katika huduma ya utoaji haki.
Tunaomba Umma ufahamu kuwa, Mahakama ya Wazi katika Mahakama ya Hakimu Mkazi Dar es Salaam Kisutu ni ndogo ikiwa na uwezo wa kuchukua watu 80 tu. Kwa uwezo huo imekubalika watakaoingia ni Mawakili wa Serikali na Watu wengine (10), Mawakili Utetezi na Watu wengine (60) na Waandishi wa Habari (10).
Aidha, ikumbukwe kwamba Mahakama hiyo inatumiwa na Mahakimu Wakazi zaidi ya 10 ambao watakuwa wanaendesha Mashauri mbalimbali katika Mahakama hiyo. Hivyo, tunashauri na kusisitiza Wananchi wote wenye nia ya kufuatilia mashauri hayo wafuatilie akaunti ya Mahakama kupitia kiungo kitakachowasilishwa kabla ya Mashauri kuanza.
Mahakama inawahakikishia umma na Watanzania wote kuwa itaendelea kutoa haki kwa uwazi, kwa wakati na kwa wote. Tunawahimiza Wananchi wote kuendelea kushirikiana na Mahakama katika kujenga mfumo wa utoaji haki unaozingatia misingi ya Kikatiba, Sheria, Kanuni na Miongozo mbalimbali.
Kiungo cha matangazo hayo mubashara kitapatikana kabla ya saa 2:30 Asubuhi tarehe 2 Juni, 2025 kupitia kurasa/ akaunti rasmi za Mahakama ya Tanzania katika Mitandao ya Jamii na tovuti ya Mahakama
www.judiciary.go.tz kabla ya mashauri kuanza.
Aidha, watakaohudhuria Mahakamani tunawasisitiza kuchukua tahadhari zote za magonjwa ya mlipuko kama Taarifa kwa Umma iliyotolewa na Wizara ya Afya tarehe 20 Mei, 2025 inavyoelekeza.
CHAMI, Gerard Julius, Mkuu wa Kitengo cha Habari, Elimu na Mawasiliano Mahakama ya Tanzania
