KERO Malalamiko kuhusu kuchelewa kutoka kwa Miundo ya Mitihani ya Kidato cha sita kwa mtaala mpya

[Anonymous]

BARUA YA MALALAMIKO​

Tarehe: 17 Septemba 2026​

KWA:
Katibu Mkuu,
Wizara ya Elimu, Sayansi na Teknolojia,
S.L.P. 10,
DODOMA.

YAH: MALALAMIKO KUHUSU KUCHELEWA KUTOKA KWA MIUNDO YA MITIHANI YA KIDATO CHA SITA (ACSEE) KWA WANAFUNZI WA MTAALA MPYA​

Ndugu Katibu Mkuu,

Tunakuandikia kuwasilisha malalamiko yetu rasmi kuhusu kuchelewa kutolewa kwa miundo ya mitihani (examination formats) ya Kidato cha Sita kwa wanafunzi wanaosoma mtaala mpya hadi kufikia sasa.

Ucheleweshaji huu umeendelea kusababisha changamoto kubwa katika maandalizi ya wanafunzi na utekelezaji wa ufundishaji shuleni, zikiwemo:

1. Kwa wanafunzi:
Wanafunzi wamekosa mwongozo wa kutosha kuhusu muundo wa maswali, namna watakavyopimwa na maeneo muhimu ya kuzingatia katika maandalizi yao. Hali hii inawaongezea hofu na presha katika kipindi ambacho wanapaswa kuwa wakijiandaa kwa mtihani wao wa mwisho.

2. Kwa walimu:
Walimu wanakabiliwa na ugumu wa kuandaa mitihani ya majaribio (mock examinations) na kufanya maandalizi ya wanafunzi kwa kuzingatia mfumo wa tathmini unaotarajiwa kutumiwa na Baraza la Mitihani la Tanzania (NECTA).

Kwa mtazamo wetu, ucheleweshaji huu unaibua maswali kuhusu uratibu na maandalizi ya miongozo ya tathmini kati ya Wizara, Taasisi ya Elimu Tanzania (TIE) na NECTA.

Kwa hiyo, tunaomba Wizara:

1. Iagize NECTA kutoa na kusambaza miundo ya mitihani pamoja na sampuli za mitihani (sample papers) kwa wakati;
2. Itoe ufafanuzi rasmi kwa umma kuhusu hali ya miundo hiyo na ratiba ya kutolewa kwake, ili kuondoa taharuki miongoni mwa wanafunzi, walimu na wazazi;
3. Ichukue hatua za haraka kuhakikisha changamoto hii inatatuliwa ili wanafunzi wapate muda wa kutosha wa kujiandaa kwa mtihani wa ACSEE.

Tunaomba suala hili lishughulikiwe kwa haraka, kwa kuzingatia maslahi ya wanafunzi na umuhimu wa kuhakikisha maandalizi yao ya mitihani yanafanyika kwa utaratibu, uwazi na uhakika.

Wako katika ujenzi wa Taifa,

 

[Anonymous]

MPAKA SASA IKIWA NI MWEZI WA TISA FORMAT YA MTIHANI MTAALA MPYA FORM SIX HAIJATOKA WANAFUNZI WANASOMA TU HAWANA DIRECTION YA MTAALA MPYA