Atafukuzwa na huku huyo maana ana mahaba mazito na hao kina Abdul Sykes.
Babu...
Hakika nina mapenzi makubwa na historia ya ukoo wa Sykes hili umesema kweli.
Hapa JF sijafukuzwa bali nimechaguliwa mwandishi bora Jukwaa la Historia miaka miwili mfululizo 2021 na 2022.
Nilipokuwa mdogo nikimsikia baba yangu akihadithia safari ya Sykes Mbuwane kutoka Afrika Kusini hadi Germany Ostafrika, maisha yake ya udogoni na Abdul, Ally na Abbas shule yao ya Al Jamiatul Islamiyya fi Tanganyika Muslim School nk.
Katika miaka ya mwanzoni 1960s Ally Sykes alikuwa na kipindi cha radio TBC akitangaza radio za Philips.
Baba alikuwa hakikosi kipindi hiki nami niko pembeni yake tunasikiliza pamoja.
Kuna kitu kikanivutia katika kipindi hiki nacho ni miziki ambayo Ally Sykes alikuwa anapiga.
Miziki mingi aliyokuwa akipiga ilikuwa kutoka Ulaya na Marekani mfano wa waimbaji kama Alma Cogan, wanamuziki wa jazz kama Louis Armstrong nk.
Baadhi ya santuri hizi zilikuwapo nyumbani kwetu na mimi nikizipiga katika radiogram ya baba pale nyumbani.
Baba akawa ananieleza kuwa wao katika ujana wao miaka ya mwishoni 1940s kuendea 1950s pamoja na Sykes brothers walikuwa na bendi ya muziki ''The Skylarks," na wakipiga miziki hiyo.
Stori hizi zikinivutia sana baba akinieleza stori za James Msikinya akipiga saxaphone kijana kutoka Afrika Kusini aliyekuwa katika bendi hiyo, Said Kastiko, Mzee Matesa katika drums Abdul Sykes akipiga clarinet, Ally Saxaphone, Abbas guitar nk. nk.
Ukiona picha zao na suti walizovaa utafurahi.
Mimi niliathirika sana.
Baba akielewana sana na Ally Sykes na akanihadithia msukosuko aliotiwa yeye siku Ally alipotoroka nyumbani kwenda kujiunga na KAR kwani Ally alipokuwa hajarudi nyumbani hadi usiku mkubwa Mzee Kleist akaekezwa kuwa mchana Ally alionekana na baba yangu wanazurura mitaani.
Hii ilikuwa mwaka wa 1942 na ulimwengu ulikuwa katika Vita Vya Pili Vya Dunia.
Wote wazee wangu hawa walikuwa wanasoma Kitchwele Boys Government School.
Stori hizi zikinivutia sana na zikawa sehemu ya maisha yangu.
Allah ana mengi ya kustaajabisha.
Historia ya Julius Nyerere na historia ya TANU katika kupigania uhuru wa Tanganyika nikaja kuisikia kutoka kinywa cha Ally Sykes sasa mimi mtu nzima na akili zangu timamu.
Historia hii ilikuwa kinyume kabisa na historia ya uhuru kama ilivyokuwa ikifahamika.
Ally Sykes akanifungulia hazina ya nyaraka zenye historia hii ambayo kila siku tunaijadili hapa.
Hebu jiweke wewe kwenye nafasi yangu.
Jiulize ungefanya nini?
Ungezikalia hizi nyaraka au ungeandika kitabu?
Mimi nikaandika kitabu.
Sihitaji kukueleza hiki kitabu kimefanya nini katika historia ya uhuru wa Tanganyika.
Haya mapenzi na historia ya Sykes yakawagusa Prof. Akyeampong na Pro. Gates wa Harvard wakaniomba niandike historia ya Kleist Sykes.
Unaweza ukaisoma katika Dictionary of African Biography, Oxford University Press, New York (2011).
Huu ndiyo mwaka Abdul na Ally Sykes wakatunukiwa Medali ya Mwenge wa Uhuru na Rais Kikwete katika kuadhimisha miaka 50 ya uhuru wa Tanganyika.