Kama ulivyosema "lengo la ugaidi ni kuwatia hofu ili ujumbe ufike kwa njia ya hofu" hapo panakuwa na sababu ya wao kutenda huo ugaidi na mara nyingi inakuwa
1) Yule anaefanya ugaidi anahisi anaonewa na hasikilizwi na kila anapojaribu kujieleza angalau asikilizwe ama hasikilizwi kabisa au anasikilizwa lakini anapuuzwa, mtu au hicho kikundi hufanya vitendo vya kigaidi dhidi ya wanaowapuuza, hii imetokea sana kule Ireland kati ya wakatoliki na waprotestant, kwa bahati mbaya wengi tumekuwa na tafsiri potofu kuhusisha ugaidi na uislam, huko nyuma pia ulifanyika ugaidi dhidi ya tawala za kikoloni na kibaguzi, sababu tawala ziliwapuuza waliopaza sauti kupinga matendo ya watawala.
2) Panakuwa na kundi la utawala ambalo vitendo na maamuzi yake vinakua havikubaliki na baadhi ya raia wake, sasa wale wanaopinga na kupaza sauti wakijenga hoja zao na ikaonekana hoja zao zina mashiko na kwamba kuna dalili za raia kuwaunga mkono, hofu huwaingia na kufanya vitendo vya kigaidi dhidi ya raia, haya yalifanywa na tawala katika nchi nyingi za latin
america na baadhi ya nchi za Africa.
Nikijibu swali lako ni kwamba vitendo nilivyoongelea hapo juu vilikoma baada ya watu kuingia katika meza ya majadiliano, watawala wawasikilize hata kama ni wachache lakini waendelee na maamuzi yao ya wengi, ukiwapa watu nafasi ya kupumua na kutowatisha katika maelezo yao mengi unaweza ukaokota moja ambalo nao wataona umewajali na ukapunguza munkari wa kujiona wanaonewa na kupuuzwa, maana hapa nchini hofu ya kupinduliwa serikali iliondolewa kwa kuanzisha mfumo wa vyama vingi, na hapo presha ya serikali ikapungua kwa kiasi kikubwa, hivi sasa sielewi kwa nini watawala wanakuwa na hofu dhidi ya mawazo kinzani, serikali ina vyombo vyote vya ulinzi na usalma.
Nakumbuka huko nyuma wapinzani walikua wakizuiwa kufanya maandamano, nadhani ilikua wakati wa kamanda Maji(nisahihishwe kama nimekosea) na presha ikawa juu sana, Tibaigana alipohamishiwa hapa akasema wanaotaka kuandamana njooni tuongee maandamano yanaazia wapi, yanaishia wapi, muda na njia ya kupita, akawapa ulinzi CUF wakaandamana na kufanya mkutano pale jangwani, hapakuwa na fujo, hili joto la sasa hivi ni kwa sababu wapinzani wanataka kutoa hisia zao na watawala hawataki kusikia toka kwa wapinzani, na wao kazi yao ni siasa, na siasa bila mikutano ni ngumu, hapo ndipo ninapomkumbuka Jakaya bingwa wa siasa za Tanzania, aliwapa nafasi watoe nyongo zao na alisema maneno yao wala hayamnyimi usingizi, na baadhi ya maneno yao aliyachukua na kuyafanyia kazi na nchi imesonga mbele sana, na wapinzani wanajua kuwa Jakaya ni bingwa wa siasa pamoja na kelele zao zote.
Ugaidi unaotokea huko Pakistan na baadhi ya nchi za mashariki ya kati ni kama ule uliokuwa Ireland kuna kundi la watu wanaona kuwa wanaonewa na hawasikilizwi na mbaya zaidi baadhi ya walioko madarakani wanapandikizwa chuki na mataifa ya magharibi.
Hapa kwetu hatuna budi kusikiliza iwe ni vikundi vya dini wana mahitaji/maoni gani, iwe ni vyama vya siasa vina maoni/mahitaji yepi hapo tutapunguza shinikizo la ugaidi/usalama, lakini njia yoyote ile ya kutisha na kuwajengea hofu huwa hazifaulu ni jambo la muda tu wanaibuka wengine, mtabaki kila siku kukimbizana na watu.
Kwenye mawazo kinzani si kila anaepinga ana nia ovu, mwingine anapinga sababu haelewi na mwingine anapinga sababu anadhani njia unayotumia si sahihi japo anaweza kuwa anaunga mkono hilo jambo, mfano wote tunahitaji watoto wetu wapate elimu iliyo bora, lakini tunatekelezaje hapo ndipo pana mawazo kinzani.
Tufanye nini?
Jibu; Ni meza huru ya majadliano.
