Waziri Kombo amuaga Waziri wa Maendeleo ya Kimataifa wa Canada baada ya kumaliza ziara ya kikazi nchini

[Ojuolegbha]

Waziri Kombo amuaga Waziri wa Maendeleo ya Kimataifa wa Canada baada ya kumaliza ziara ya kikazi nchini

Waziri wa Mambo ya Nje na Ushirikiano wa Afrika Mashariki, Mhe. Balozi Mahmoud Thabit Kombo (Mb), ameagana na Waziri wa Maendeleo ya Kimataifa wa Canada Mhe. Randeep Sarai katika Uwanja wa Ndege wa Kimataifa wa Julius Nyerere, Dar es Salaam baada ya kukamilisha ziara yake ya kikazi ya siku tatu nchini.

Ziara hiyo iliyoanza tarehe 20 hadi 23 Julai, 2025 ililenga kuimarisha ushirikiano katika diplomasia ya Uchumi husani katika maeneo ya biashara na uwekezaji, ili kuleta maendeleo endelevu kwa manufaa ya wananchi wa pande zote mbili.

Viongozi hao wamekubaliana kuendelea kuibua maeneo ya ushirikiano katika sekta za kiuchumi zitakazowezesha kukuza ubunifu, kuongeza ajira kwa vijana na wanawake, na kuhamasisha ukuaji wa maendeleo ya jamii, hususani vijijini.

Awali, Mhe. Kombo aliishukuru Serikali ya Canada kwa ushirikiano wa muda mrefu na Tanzania, kwa kuchangia utekelezaji wa Dira ya Taifa ya Maendeleo ya Mwaka 2020-2025, iliyolenga kujenga uchumi imara na shindani, kuboresha maisha ya wananchi wote, kuimarisha utawala bora na kukuza uchumi unaochochea ukuaji wa viwanda na uwekezaji.

Mhe. Randeep Sarai alieleza dhamira ya Serikali ya Canada ya kuendelea kuwa mshirika wa karibu wa Tanzania kwa kusaidia maeneo yenye uhitaji mkubwa kama vile uwezeshaji wa vijana na wanawake, uwekezaji wa kimkakati katika sekta za madini, uvuvi, nishati safi, elimu, mafunzo ya ukuzaji ujuzi, pamoja na kuimarisha misingi ya amani na usalama katika kuleta maendeleo ya watu wa nchi zote mbili.