Kaburi lenye miili ya watu zaidi ya 200 lagunduliwa huko Mariupol, Ukraine
View attachment 2164134
Umoja wa Mataifa umegundua kaburi la pamoja kusini mwa mji wa Mariupol, Ukraine ambalo unasema linaweza kuwa na miili ya watu 200.
Matilda Bogner, mkuu wa ujumbe wa ufuatiliaji wa haki za binadamu wa Umoja wa Mataifa nchini Ukraine, amesema timu yake inajaribu kutathmini kiwango halisi cha vifo vya raia.
"Kuna kaburi moja tumeweza kupata taarifa zake kwa satelaiti, na tunakadiria kuwa moja ya makaburi hayo ya pamoja yana watu 200," alisema.
Lakini "hiyo haimaanishi kuwa watu hao wote ni waliokufa ni raia", aliongeza - kwa kuwa idadi hiyo ya Umoja wa Mataifa haijumuishi vifo vya wanajeshi au wale wanaokufa kwa sababu nyingine wakati wa vita.
Takriban raia 1,035 wameuawa, alisema - ingawa Umoja wa Mataifa umekuwa ukisema mara kwa mara kuwa unaamini idadi ya vifo ni kubwa zaidi kuliko idadi rasmi inayotajwa, kutokana na ugumu wa kuthibitisha ripoti na kupata taarifa kutoka maeneo yaliyoathiriwa na vita.
Mapema wiki hii, makamanda wa eneo hilo walisema wanadhani idadi ya vifo vya Mariupol pekee inaweza kuwa zaidi ya watu 3,000. Miili mara nyingi huachwa mitaani kwa sababu ya hatari kuiokoa, na wengi wao baadaye huishia kuzikwa kwenye makaburi ya halaiki.
