Wanamapinduzi wa Libya wameripotiwa kudhibiti uwanja wa ndege wa kimataifa wa Tripoli, huku wakiendelea kuelekea katika makao makuu ya Gaddafi katikati mwa mji mkuu huo. Hii ni katika hali ambayo milipuko kadhaa na milio ya risasi ilisika usiku wa jana katika maeneo kadhaa ya mji huo. Wakati hayo yakiripotiwa Mohamed al Harizi afisa wa ngazi za juu wa wanamapinduzi wa Libya amewaambia waandishi habari kwamba, wanamapinduzi 123 wameuawa katika wilaya ya Tajoura mjini Tripoli. Hata hivyo amesema wilaya hiyo ingali mikononi mwa wanamapinduzi hao pamoja na eneo jingine la mji huo la Souq al Jumaa.
Wakati huo huo Kanali Muammar Gaddafi wa Libya amewataka wanaomuunga mkono kuandamana kwa mamilioni na kusitisha kile alichokiita uasi wa muda mrefu dhidi ya taifa hilo. Pia Gaddafi amezituhumu nchi za Magharibi na wanamapinduzi wa nchi hiyo kuwa wanapigania utajiri wa mafuta wa Libya.
Habari zaidi zinasema kuwa Thabo Mbeki Rais wa zamani wa Afrika Kusini amezikosoa nchi za Magharibi kwa kurefusha vita vya Libya. Mbeki amesema kuwa, kama nchi za Magharibi zingesikiliza mapendekezo ya viongozi wa Kiafrika, kungekuwa na uwezekano wa kusitishwa mapema zaidi vita vya Libya. Rais huyo wa zamani wa Afrika Kusini aidha amesema, Umoja wa Afrika ulitoa mapendekezo ambayo yalikubaliwa na serikali ya Libya lakini vikosi vya nchi za Magharibi vilitoa mashinikizo kwa viongozi wa Afrika kuhusiana na suala hilo.
Katika upande mwingine Tunisia imelitambua Baraza la Kitaifa la Mpito la Libya ambalo linajumuisha viongozi wa upinzani kuwa mwakilishi rasmi wa wananchi wa nchi hiyo. Wizara ya Mambo ya Nje ya Tunisia imetambua baraza hilo lenye makao yake katika mji wa Benghazi hatua inayoifanya nchi hiyo jirani na Libya kujiunga katika safu za nchi zinazompinga Kanali Muammar Gaddafi.
