Nawashukuru kwa majibu yenu. Kwa mtazamo wangu, karibia maswali yote yamejibiwa kwa tahadhari na umakini mkubwa. Hilo sina shaka nalo. Nyinyi ni Serikali na pia mnatekeleza ilani ya
CCM pasipo na shaka yoyote ile.
Safari hii nimekuja tu kwa ajili ya kutoa ushauri kwa manufaa ya Taifa letu.
Mkiwa kama Serikali iliyopewa dhamana ya kuwaongoza/kuwatawala Watanzania zaidi ya milioni 50, mnatakiwa KUBADILIKA! Punguzeni au ikiwezekana acheni kabisa kitu kinachoitwa UHAFIDHINA!
Mimi ni mmoja kati ya watanzania wengi walioshiriki kwenye zoezi la mchakato wa Katiba Mpya kuanzia mwanzo mpaka mwisho. Nilibahatika kulifuatilia Bunge la Katiba kupitia luninga, na pia sarakasi zilizokuja kujitokeza kati ya pande mbili; CCM vs UKAWA kuhusu aina ya Serikali za kuiunda Tanzania Mpya!
Hakuna shaka yoyote ile kusema, mchakato ule ulivurugwa na Wanasiasa! Na mpaka leo sijapata jibu ni kwa nini Rais wa wakati ule aliamua kujaza Wanasiasa wengi (huku akitambua fika WANASIASA WOTE ni WABINAFSI na wengi wao wapo kwa ajili ya maslahi yao na ya vyama vyao) kuliko wataalamu wa makundi mbalimbali, huku hao wanasiasa wakibakia kuwa wachache.
Turudi kwenye mjadala:
1.) Naomba mfanyie kazi niliyo waeleza. Mkiwa kama Wizara, mna uwezo wa kumshauri Mh. Rais kuhusu umuhimu wa Katiba Mpya. Mwambieni Watanzania tulio wengi tunahitaji Katiba Mpya. Ikiendelea kutumika hii Katiba ya Chama Kimoja ya 1977, inaweza kuja kusababisha machafuko siku za usoni. Na hilo siliombei. Kisingizio cha kufanya maendeleo, hakina mashiko sana! Maendeleo bila Katiba Bora/mfumo imara wa kiutawala na mgawanyo mzuri wa madaraka, ni kazi bure!
By the way, hii ni awamu yake ya mwisho kutawala! hivyo hana cha kupoteza iwapo atatuachia Watanzania zawadi bora kabisa ya Katiba Mpya kama alivyojaribu Mtangulizi wake na mwisho kuishia kushindwa hatua za mwisho! Hayo madaraja mnayojenga, ndege mnazo nunua, flyovers, treni ya umeme, vitaishia tu kubomolewa na kuharibiwa vibaya! iwapo tu vitatokea vita vya wenyewe kwa wenyewe kwa sababu tu ya uwepo wa Katiba isiyo kidhi mahitaji ya wengi. Tujifunze kutoka LIBYA!
2.) Suala la Uraia Pacha, naomba nalo mlitafakari kwa kina. Mnaweza mkawapa haki zote hao Diaspora katika nyanja za uchumi na masuala ya kijamii na kuwabana sana kwenye masuala ya kisiasa kama mnaogopa hao kama watakuja kuwanyang'anya vyeo vyenu. Leo hii wenzetu wa Algeria, Morocco, Afrika Magharibi, nk. Wananufaika na Uraia Pacha kupitia michezo, uwekezaji, nk. Sisi tumekaza tu shingo huku tukiwa hatuna hata sababu zenye mashiko za kuzuia huo Uraia Pacha.
3.) Kuhusu suala la Mgombea Binafsi, Matokeo ya Rais kupingwa Mahakamani, nk. Ni vitu ambavyo havizuiliki kwa sasa! Haya mambo ya kumlazimisha mtu kudhaminiwa na Chama cha Kisiasa kugombea nafasi ya Uongozi, kunadumaza Demokrasia na pia kunaongeza kiwango cha UNAFIKI na kujipendekeza nchini.
4.) Kuhusu ishu ya baadhi ya watu mfano POLISI kuwa juu ya sheria, nalo mlitazame kwa kina. Kwa sasa POLISI wetu wamejigeuza kuwa MAHAKAMA! (Kwenye kuua watuhumiwa wanao dhaniwa kuwa ni majambazi, kupokea rushwa na pia kwenye utozaji wa faini ya makisa ya barabarani) Jambo hili halikubaliki! Maana hao polisi ni binadamu! Kuna ushahidi mwingi tu wa kukengeuka kwao. Na mfano mdogo tu ni huo wa Wafanyabiashara wa madini kutoka Mahenge.
Naomba kuwasilisha.