Hofu imetajwa kuibuka kuhusu uwezekano wa Mwenyekiti wa CHADEMA, Tundu Lissu, kutofikishwa mahakamani kama ilivyopangwa Aprili 24, 2025, katika kesi ya uhaini inayomkabili, hali iliyosababisha wito wa wazi kutoka kwa wakili Peter Kibatala, akisisitiza kuwa jaribio lolote la aina hiyo litakumbana na upinzani mkali wa kisheria.
Akizungumza kupitia taarifa maalum aliyoichapisha katika kurasa za mitandao yake ya kijamii, Kibatala amesema wanahofia mipango isiyo rasmi ya kuzuia au kuchelewesha kufikishwa kwa Lissu mahakamani, jambo ambalo litakuwa ni ukiukwaji mkubwa wa haki za kisheria na uhuru wa kikatiba wa kusikilizwa kwa wazi mbele ya umma.
“Jaribio lolote la kutomfikisha Mahakamani Antipas Tundu Lissu Mughwai tarehe 24 Aprili 2025 litakumbana na upinzani mkali wa kisheria. Tunaamini wale wanaohusika hawatajihusisha na mipango ya kipumbavu ya aina hiyo,” amesema Kibatala.
Katika hatua ya kuhakikisha uwazi wa mchakato wa kisheria, Kibatala amesema kuwa kesho Aprili 22, 2025 ataandika rasmi kwa Mabalozi wa Kundi la Kidiplomasia nchini Tanzania kuwaalika maafisa wao kuhudhuria mahakamani na kushuhudia mwenendo wa kesi hiyo.
“Kesi hii ina athari za Kitaifa na Kimataifa, tunahitaji uwazi wa hali ya juu. Dunia nzima ishuhudie namna Jeshi la Polisi na mahakama zetu zitakavyoshughulikia haki ya kisheria ya umma ya kuhudhuria mashauri ya jinai ya umuhimu kama huu,” ameongeza.
Mbali na mabalozi, Wakili Kibatala pia amesema atauandikia viongozi wa madhehebu makuu ya kidini na taasisi mbalimbali, kuwaalika kushiriki na kushuhudia mwenendo wa kesi hiyo, kama sehemu ya kulinda haki na kudumisha uwazi wa kidemokrasia.
“Viongozi wa dini na taasisi za kijamii wana nafasi kubwa ya kushuhudia na kushirikiana na wananchi kuona haki inatendeka bila upendeleo wala vitisho,” amesema.
Kibatala amesisitiza kuwa CHADEMA na watetezi wa haki za binadamu nchini wanataka kesi hiyo ifanyike mbele ya umma kwa uwazi, ili aibu ibaki kwa upande unaopaswa kubeba jukumu la hali hiyo.
“Tunataka Antipas Tundu Lissu Mughwai afikishwe mahakamani mbele ya umma kwa uwazi kabisa; aibu ibebwe na upande unaostahili — bila shaka tunajua ni upande upi huo,” a
View attachment 3311381mesema Kibatala.