Kutoka kwenye Mahakama ya Hakimu Mkazi Kisutu, jijini Dar es Salaam leo, Jumatatu Mei 19.2025 kesi ya uhaini inayomkabili Mwenyekiti wa Chama cha Demokrasia na Maendeleo (CHADEMA) Taifa Wakili Tundu Lissu ililetwa kwa ajili ya kutajwa, ambapo upande wa Jamhuri umeieleza Mahakama kuwa upelelezi wa shauri hilo bado haujakamilika
Jamhuri imesema mpaka sana shauri hilo linaendelea na uchunguzi chini ya mamlaka za Kipolisi, na kwamba kwakuwa upelelezi haujakamilika hivyo wanaiomba Mahakama kuhairisha kesi husika kwa siku 14 zaidi, jambo ambalo limeonekana kupingwa vikali na Mawakili wa utetezi
Jopo la Mawakili wa utetezi likiongozwa na Mawakili waandamizi Mpale Mpoki, Dkt. Rugemeleza Nshala na Peter waliwasilisha maombi kadhaa Mahakamani hapo, ambapo miongoni mwake wameiomba Mahakama 'kulazimisha' upande wa Jamhuri ueleze nini hasa kinachokwamisha upelelezi kwa sababu mwanzo ilidaiwa Mahakamani hapo kuwa ushahidi wote kuhusiana na shauri hilo upo mtandaoni
Jambo la pili walilowasilisha Mawakili wa utetezi Mahakamani hapo ni kwamba, hawafurahishwi namna ambavyo mteja wao anavyokuwa amezungukwa na maafisa wa Jeshi la Magereza (askari), ambapo wameishawishi Mahakama kutoa amri ya kuwaondoa askari wote 'wanaomlinda' Lissu ndani ya chumba cha Mahakama, kwakuwa kwa mujibu wa Katiba ya Jamhuri ya Muungano wa Tanzania 1977 Mahakama haimtambui mtuhumiwa kama 'mkosaji' na kwamba kitendo cha mteja wao kuzungukwa na askari wengi haikubaliki
Ukijibu hoja hizo, upande wa Jamhuri umeieleza Mahakama kuwa licha ya kwamba Katiba imeeleza hivyo, lakini haijatoa maelekezo ya aina gani ya ulinzi inahitajika kwa mtuhumiwa pindi anapokuwa ndani ya chumba cha Mahakama, hivyo kuiomba Mahakama kutupilia mbali maombi hayo na kwamba ikiwezekana wanaomba ulinzi huo uongezwe
Mawakili hao wa serikali wameenda mbali zaidi kwa kueleza kuwa suala la ulinzi lina faida kwa mtuhumiwa mwenyewe, Mahakama na maafisa wa Mahakama kwa ujumla wake
Kuhusu suala la kueleza sababu inayopelekea upelelezi kutokamilika kwa wakati, Mawakili wa serikali wamejibu kuwa hakuna sehemu yoyote ya kisheria na Kikatiba inayowalazimisha kueleza hatua ya upelelezi iliyofikiwa, na kwamba mambo ya upelelezi sio ya kuwekewa hadharani, kikubwa kilichosisitizwa ni kwamba ndani ya muda waliiomba wa siku 14 wanaamini watakuwa wamefikia hatua nzuri ya upelelezi
Jambo lingine lililoibuka Mahakamani hapo ambalo limeletwa na upande wa utetezi, na ambalo halikupingwa na upande wa Jamhuri ni kuiomba Mahakama kutumia 'busara' zake kuondoa amri ya shauri hilo la uhaini kusikilizwa kwa njia ya mtandao badala yake mtuhumiwa awe anafikishwa Mahakamani moja kwa moja kama ilivyokuwa leo
Baada ya kusikiliza hoja za pande zote mbili, Mahakama imesisitiza Jamhuri kukamilisha upelelezi kwa wakati na tarehe ijayo Mahakama ipate mrejesho wa hatua iliyofikiwa, kuhusu suala la ulinzi wa Mahakama imesema mshtakiwa ni kweli anatakiwa kuwa huru akiwa kizimbani, hivyo tarehe ijayo Mahakama imeagiza vyombo vya usalama kufanya uchunguzi wa kutosha kama hakuna sababu zozote za vitisho vya usalama wake basi mtuhumiwa awe huru peke yake akiwa kizimbani
Kuhusu suala la shauri hilo kuendelea kuendeshwa kwa njia ya mtandao, Mahakama imesema sheria inaipa Mahakama mamlaka ya kusikiliza au kuendesha shauri kwa njia itakayoona inafaa ikiwemo mtandao, na kwamba kwakuwa shauri hilo ni kubwa na linagusa hisia za wengi hivyo Mahakama imeona hoja za utetezi zina mashiko, hivyo Mahakama imeamuru tarehe ijayo shauri liendelee kwa mtuhumiwa kuletwa Mahakamani moja kwa moja kama ilivyokuwa leo
Baada ya kutoa maamuzi hayo, Mahakama imeahirisha shauri hilo kwa siku 14 hadi 02/06/2025 na mtuhumiwa amerejeshwa rumande
Ikumbukwe kuwa kesi hiyo ya uhaini kwa kawaida inasikilizwa kwa njia ya mtandao, leo imesikilizwa kwa njia ya kawaida kutokana na busara ya Mahakama kwakuwa mtuhumiwa anakabiliwa na shauri jingine Mahakamani hapo (shauri la uchochezi na kuchapisha taarifa za uwongo kwenye mtandao wa kijamii wa YouTube)
======
Update Saa Nne Asubuhi: Kibatala aomba kesi ya Uhaini pia iendeshwe kwa njia ya mahakama ya wazi - Kwa kuwa kesi ya uhaini aliyopewa Tundu Lissu ina maslahi ya umma, mawakili wa utetezi wameomba mahakama kwamba mahakama itoe amri isiendeshwe kwa njia mtandao na kwamba itenganishe siku na kesi ya uchochezi na siku ya kesi ya uhaini na kesi zote mtuhumiwa aletwe mahakamani.
Update Saa Tatu Asubuhi: Lissu afikishwa mahakama ya Kisutu, awapunguia wananchi na wananchama waliokuja kufuatilia kesi hiyo, pia Godbless Lema, Boni Yai na viongozi wengine wa CHADEMA wafika kwenye mahakama ya Mkazi Kisutu
Update Saa Mbili Asubuhi: Foleni ndefu nje ya Mahakama ya Kisutu, wananchi wakiwa wamejitokeza kwa wingi kwa ajili ya kusikiliza kesi ya Uhaini inayomkabili Mwenyekiti wa CHADEMA Tundu Lissu.
======
Update Saa Moja Asubuhi: Jaji Mkuu Mstaafu Kenya, Willy mutunga, waanasiasa, baadhi ya waandishi wa habari na wananchi kutoka kenya washikiliwa uwanja wa Nyerere.
=====
Update Saa Moja Asubuhi: Hali ilivyo Mahakama ya Kisutu, polisi waonekana huku hali ikionekana kuwa shwari
=====
Leo ndio siku iliyokuwa inasubiriwa na wengi ambapo umma umeruhusiwa kwenda kusikiliza kesi ya Lissu na kujua yatakayojiri, ikiwepo na kumuona kwa wale ambao walinyimwa fursa hiyo walipokwenda kumuona.
Mara ya kwanza ilitokea virugu, waandishi, wananchama na wananchi wakapigwa na kupelekea kesi kuendeshwa mtandaoni.
Nini kitajiri siku ya leo? Muda utaamua!
Hivi ndivyo hali ilivyo nje ya Mahakama ya Kisutu muda huu saa 12 asubuhi Polisi wakionekana kuimarisha ulinzi.
===