Mathias alisafiri tarehe 26 Septemba 1983 kutoka Dar es Salaam kwenda Mwanza na basi la KAMATA na kulipa nauli shilingi 200 (angalia jina la tiketi). Mimi nilisafiri Agosti 1985 kutoka Kyela, Mbeya kwenda Dar es Salaam na basi la KAMATA na kulipa nauli shiligi 43. Hii ilikuwa ni nusu nauli, nauli kamili ilikuwa ni shilingi 86. Safari yetu kutoka Kyela ilianza saa 4 asubuhi, tulifika Dar es Salaam kesho yake saa 11 jioni. Mimi sikuhifadhi tiketi yangu, lakini niliyoiweka hapa nimeipata kwa Joel Wilson Msella.
Ili kupata shilingi 43 kwa ajili ya nauli yangu ilinibidi niuze maziwa mwezi mzima. Kila siku nilikuwa ninapeleka lita moja ya maziwa kwa mama mmoja aliyeitwa Ijeje aliyekuwa anaishi karibu na Misheni ya Roman Catholic. Nilifanya zoezi hilo mwezi mzima na mwisho wa mwezi nikalipwa pesa. Utaratibu ule ulikuwa unaitwa 'kipande'. Ilikuwa kila siku tunapeleka maziwa lakini tunachukua pesa mwisho wa mwezi.
Enzi zile ilikuwa mtoto akitaka pesa ilimlazimu kuifanyia kazi. Ilikuwa ama tuuze maziwa, au tuuze korosho. Maziwa na korosho vilikuwa ni ndani ya uwezo wetu lakini mpunga ni lazima kikaliwe kikao cha baba na mama ndio uuzwe. Kuuza maziwa kilikuwa kikao kati ya baba na mtoto ingawa mama ilikuwa lazima ajue. Lakini korosho ilikuwa ni nguvu yako kuokota.
Je, umewahi kusafiri na KAMATA, KWACHA au Railways miaka hiyo? Je, unajua kuwa serikali ndiyo iliyokuwa na makampuni ya usafiri? Je, unajua kuwa utaratibu wa watu binafsi kuanza kumiliki mabasi ulianza mwaka 1990 baada ya serikali kuacha kumiliki makampuni ya usafiri?
Je, nini kimekushangaza? Je, nini maoni yako?
Askofu Emmaus Bandekile Mwamakula
Dar es Salaam, 7 Mei 2023
View attachment 2614329