Ujumbe kwa Ndugu Andrew Burito Kambarage.
Ndugu yangu na Baba yangu, Andrew Burito Kambarage,
Nakuandikia ujumbe huu kwa heshima kubwa na kwa moyo wa upendo. Si kwa lengo la kukushambulia, bali kushiriki hisia ambazo zimekuwa moyoni mwangu kwa muda mrefu.
Naamini ulipata neema ya kipekee sana maishani. Si kila mtu hupata nafasi ya kuzaliwa akiwa mtoto wa kwanza, tena wa kiume, wa Baba wa Taifa, . Wapo wengi ambao hawakuwahi hata kuwafahamu baba zao tangu walipozaliwa. Wewe ulipata fursa ya kukulia chini ya mtu ambaye historia ya Tanzania na Afrika itaendelea kumkumbuka kwa mchango wake mkubwa.
Mwalimu Nyerere hakujulikana kwa uongozi wake pekee, bali pia kwa maisha ya nidhamu, unyenyekevu, uchamungu, uzalendo, kujitolea kwa wananchi na kuweka maslahi ya taifa mbele kuliko yake binafsi. Alikuwa mfano wa kiongozi ambaye wengi walitamani kuiga.
Kwa sababu hiyo, mara nyingi nimekuwa nikijiuliza: Je, ni mzigo mkubwa kiasi gani kubeba jina la Mwalimu Nyerere? Lazima si jambo rahisi. Lakini kadiri miaka inavyopita, Watanzania wengi hutamani kuona watoto wake wakiendeleza maadili na urithi aliouacha.
Nimekuwa nikisikitishwa ninaposikia au kuona taarifa mbalimbali zinazowahusu baadhi ya watoto wa Mwalimu ambazo hazipatani na taswira ya maadili aliyoyaishi. Ikiwa baadhi ya taarifa hizo ni za kweli, basi ni jambo la kusikitisha sana. Sio kwa sababu hakuna binadamu mkamilifu, bali kwa sababu jina la Mwalimu Nyerere lina uzito mkubwa machoni mwa Watanzania na Waafrika wengi.
Leo alfajiri, majira ya saa 5:05, nimekuwa nikisikiliza hotuba ya Baba yako akizungumzia utawala wa , akielezea madhara ya uongozi wa mabavu na matumizi ya nguvu badala ya haki. Nilipokuwa nikimsikiliza, nilikumbuka hekima yake, ujasiri wake wa kusema ukweli na namna alivyolitetea taifa na bara la Afrika. Nilihisi uchungu nikijiuliza kama kuna yeyote katika familia yake atakayeendeleza urithi huo kwa nguvu ileile ya maadili na fikra.
Ujumbe wangu kwako si wa hukumu bali wa maombi. Bado haijachelewa. Bado mna nafasi ya kulinda na kuheshimu urithi wa Baba yenu. Watanzania wengi wangependa kuwakumbuka si kwa jina la Nyerere pekee, bali pia kwa matendo yanayoendana na maadili aliyoyaishi.
Kumbukeni kwamba jina kubwa ni zawadi, lakini pia ni wajibu. Vizazi vijavyo vitawatazama si kwa sababu tu ni watoto wa Mwalimu Nyerere, bali kwa namna mlivyoishi na kuitunza heshima ya familia yenu.
Mungu awape hekima, nguvu na neema ya kuendelea kulinda urithi wa Baba wa Taifa kwa maneno, matendo na maisha yenu.
Poleni sana, na Mungu awabariki.
